'నిత్యామీనన్ - అభిషేక్ బచ్చన్' సైకో థ్రిల్లర్ వెబ్ సిరీస్ ఫస్ట్ లుక్ విడుదల!

టాలీవుడ్ ఇండస్ట్రీకి ‘అలా మొదలైంది..’ సినిమాతో పరిచయమైన బొద్దుగుమ్మ నిత్యా మీనన్. మొదటి సినిమాతోనే టాలీవుడ్ ప్రేక్షకులలో మంచి క్రేజ్ సంపాదించింది. ఇక నితిన్ సరసన ఇష్క్ సినిమాతో యువత హృదయాలలో చిరస్థానం సంపాదించుకుంది ఈ కేరళ కుట్టి. ఆ తర్వాత మళ్లీ నితిన్ సరసన ‘గుండె జారి గల్లంతయ్యిందే’తో కుర్రకారు గుండెలను గల్లంతు చేసింది. ఇక ఆ సినిమా తర్వాత తెలుగు ఇండస్ట్రీపై అంతగా కాన్సంట్రేట్ చేయలేదు ఈ బ్యూటీ. చివరగా గతేడాది బాలీవుడ్ ‘మిషన్ మంగళ్’ సినిమాలో కనిపించిన నిత్య.. ప్రస్తుతం వెబ్ సిరీస్‌లపై దృష్టి పెట్టిందని కొన్ని రోజులుగా వార్తలు వస్తున్నాయి. వాటిని నిజం చేస్తూ తన తొలి వెబ్ సిరీస్ ఫస్ట్‌ లుక్ రిలీజ్ చేసింది. ‘బ్రీత్ ఇన్ టు ద షాడోస్’ పేరుతో వస్తున్న సిరీస్ ఫస్ట్ లుక్ చాలా ఇంట్రెస్టింగ్‌గా ఉంది. పగిలిపోయిన మాస్క్ ముక్కల నడుమ చిన్నారి పడుకుని ఉన్న పోస్టర్ ఆసక్తి రేపుతోంది.

నీడలో పడుకుని ఉంటూ.. ఏదో దొరుకుతుందని ఎదురుచూస్తోందనే.. క్యాప్షన్‌తో ఫస్ట్ లుక్ రిలీజ్ చేసిన నిత్య.. ఈ వెబ్ సిరీస్ జులై 10న అమెజాన్ ప్రైమ్‌లో స్ట్రీమింగ్ కాబోతున్నట్లు తెలిపింది. బ్రీత్ వెబ్ సిరీస్ మొదటి భాగంలో స్టార్ యాక్టర్ మాధవన్ లీడ్ రోల్ లో నటించాడు. ఇక ప్రస్తుతం అదే వెబ్ సిరీస్ ‘బ్రీత్ వెబ్ సిరీస్’కు సీక్వెల్‌గా వస్తున్న ఈ సిరీస్‌లో స్టార్ యాక్టర్ అభిషేక్ బచ్చన్ కీలక పాత్ర పోషిస్తున్నాడు. ఇక్కడ విశేషం ఏంటంటే.. అభిషేక్ బచ్చన్ కూడా ఈ వెబ్ సిరీస్ తోనే డిజిటల్ ప్లాట్ ఫామ్ లోకి అడుగు పెడుతున్నాడు. ఆయన కూడా తన ట్విట్టర్ ఖాతా ద్వారా ఫస్ట్ లుక్ పోస్టర్ రిలీజ్ చేసాడు. ఎంతో థ్రిల్ కి గురిచేస్తున్న ఈ ఫస్ట్ లుక్ సోషల్ మీడియాలో వైరల్ అవుతోంది. అయితే మయాంక్ శర్మ దర్శకత్వం వహించిన ఈ సైకలాజికల్ థ్రిల్లర్ సిరీస్‌ను అబండెన్షియా ఎంటర్‌టైన్మెంట్ సంస్థ నిర్మించింది. ప్రస్తుతం నెటిజన్లలో ఆసక్తి రేపుతున్న ఈ వెబ్ సిరీస్ అంచనాలు అమాంతం పెంచుతోంది.