ఇంటెన్స్ అండ్ గ్రిప్పింగ్ గా 'బ్రీత్ 3' ట్రైలర్.. కిల్లర్ గా తిరిగొచ్చిన అభిషేక్..!

ప్రముఖ డిజిటల్ వేదిక అమెజాన్ ప్రైమ్ వీడియో.. వీక్షకులను ఆకట్టుకునేందుకు ఎప్పటికప్పుడు ఫ్రెష్ కంటెంట్ ను అందించడానికి ప్రయత్నం చేస్తోంది. బ్లాక్ బస్టర్ సినిమాలు - సరికొత్త వెబ్ సిరీస్ లను అందుబాటులోకి తీసుకొస్తోంది. ప్రైమ్ వీడియో రూపొందించిన ఆసక్తికరమైన ఒరిజినల్ సిరీస్ లలో "బ్రీత్" ఒకటి.

విలక్షణ హీరో మాధవన్ మరియు అమిత్ షాద్ ప్రధాన పాత్రల్లో రూపొందిన 'బ్రీత్' మొదటి సీజన్ కు అనూహ్య స్పందన లభించింది. అయితే ఈ సిరీస్ లో కొనసాగడానికి హీరో మాధవన్ ఆసక్తి చూపకపోవడంతో.. సీజన్-2 కోసం బాలీవుడ్ హీరో అభిషేక్ బచ్చన్‌ లీడ్ రోల్ లోకి తీసుకొచ్చారు.

'బ్రీత్: ఇన్ టూ ది షాడోస్' అనే పేరుతో వచ్చిన రెండో సీజన్ లో జూనియర్ బచ్చన్ తో పాటుగా నిత్యా మీనన్ మరియు అమిత్ షాద్ ఇతర ప్రధాన పాత్రల్లో కనిపించారు. అయితే ఈ వెబ్ సిరీస్‌ ఇప్పుడు సరికొత్త సీజన్ తో ప్రేక్షకులను అలరించడానికి రెడీ అయింది. తాజాగా ''బ్రీత్ 3'' ట్రైలర్ ను ఆవిష్కరించారు.

నిజానికి 'బ్రీత్ 2' సీజన్ కు విమర్శకుల నుండి మిశ్రమ సమీక్షలు వచ్చాయి. అయితే ఇందులో అవినాష్ మరియు జె గా రెండు వేరియశషన్స్ ఉన్న పాత్రలో అభిషేక్ బచ్చన్ అందరినీ ఆకట్టుకున్నాడు. ఇప్పుడు 'బ్రీత్ 3' లోనూ అదే పాత్రని మెయిన్ లీడ్ గా కొనసాగించారు.

అయితే ఇందులో అభిషేక్ తో పాటుగా మరో కొత్త పార్ట్నర్-ఇన్-క్రైమ్ విక్టర్ (నవీన్ కస్తూరియా) వచ్చి చేరాడు. ఈసారి అభిషేక్ ను ఉపయోగించుకుని మరో కిల్లర్ హత్యలు చేయిస్తున్నట్లు ట్రైలర్ ని బట్టి తెలుస్తోంది. అభిషేక్ భార్యగా నిత్యా మీనన్ కనిపించగా.. సయామి ఖేర్ కీలక పాత్ర పోషించింది.

పోలీసాఫీసర్ కబీర్ సావంత్ (అమిత్ షాద్) ఎప్పటిలాగే తన జీవిత యుద్ధంలో పోరాడుతూ.. ఇద్దరు కిల్లర్స్ ని అంతం చేసి సమాజాన్ని రక్షించడానికి ప్రయత్నిస్తున్నాడు. ట్రైలర్ లో ప్రధాన పాత్రలన్నీ ఇంటెన్స్ గా కనిపించాయి. కొత్తగా ఈ సిరీస్ లో ఎంట్రీ ఇచ్చిన నవీన్ కస్తూరియా.. ట్రైలర్ లో ఫ్రెష్ ఫీలింగ్ ని కలిగించాడు.

అభిషేక్ బచ్చన్ డబుల్ యాక్షన్ రోల్ తో మరోసారి మెప్పించనున్నట్లు అర్థమవుతోంది. ఇందులో యాక్షన్ కు కూడా ప్రాధాన్యత ఇచ్చారు. అలానే మరింత గ్రిప్పింగ్ గా తీర్చిదిద్దినట్లు తెలుస్తోంది. 'బ్రీత్ 3' ట్రైలర్ లో విజువల్స్ మరియు బ్యాగ్రౌండ్ స్కోర్ అదనపు ఆకర్షణగా నిలిచాయి.

''బ్రీత్ 3'' సిరీస్ కు మయాంక్ శర్మ దర్శకత్వం వహించారు. విక్రమ్ మల్హోత్రా మరియు అబున్డంటియా ఎంటర్టైన్మెంట్స్ సంయుక్తంగా నిర్మించారు. ఈ సిరీస్ ను నవంబర్ 9న అమెజాన్ ప్రైమ్‌ వీడియోలో స్ట్రీమింగ్ చేయనున్నట్లు మేకర్స్ అధికారికంగా ప్రకటించారు.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.