'బ్రో డాడీ' రీమేక్ లో మామా అల్లుళ్ళు సెట్ అవుతారా..?

తెలుగు సినిమాలు ఇతర భాషల్లోకి రీమేక్ అవుతుంటే.. అక్కడ విజయం సాధించిన కథలను మనవాళ్ళు అరువు తెచ్చుకోవడం అనేది ఎప్పటి నుంచో మనం చూస్తూనే ఉన్నాం. టాలీవుడ్ లో రీమేక్ సినిమాలు చేయడానికి ఆసక్తి కనబరిచే నిర్మాణ సంస్థల్లో సురేష్ ప్రొడక్షన్స్.. హీరోల్లో విక్టరీ వెంకటేష్ గురించి ప్రముఖంగా చెప్పుకోవచ్చు. అగ్ర నిర్మాత డి.సురేష్ బాబు రీమేక్ కథలను తీసుకొచ్చి వెంకీతో కలిసి అనేక సూపర్ హిట్స్ అందుకున్నారు. అయితే దగ్గుబాటి వారసుల దృష్టి ఇప్పుడు మలయాళ మూవీ 'బ్రో డాడీ' మీద పడిందని టాక్ వినిపిస్తోంది.

పృథ్వీరాజ్ సుకుమారన్ స్వీయ దర్శకత్వంలో మలయాళ సూపర్ స్టార్ మోహన్‌ లాల్ - పృథ్వీరాజ్ కలిసి నటించిన తాజా చిత్రం 'బ్రో డాడీ'. ఇటీవల డిస్నీ ప్లస్ హాట్ స్టార్ వేదికగా విడుదలైన ఈ సినిమా ప్రేక్షకులను ఎంతగానో ఆకట్టుకుంది. కళ్యాణి ప్రియదర్శన్ తో లివ్-ఇన్-రిలేషన్ షిప్ లో ఉన్న పృథ్వీరాజ్.. పెళ్లికి ముందే ఆమెను గర్భవతిని చేయడం.. అదే సమయంలో పృథ్వీరాజ్ తల్లితండ్రులు మోహన్ లాల్ - మీనా కూడా మరో బిడ్డకు జన్మనివ్వడానికి రెడీ అయిన తర్వాత వారు ఎలాంటి పరిస్థితులను ఎదుర్కొన్నారనేది ఈ సినిమాలో హాస్యాస్పదంగా చూపించారు.

అయితే 'బ్రో డాడీ' సినిమా తెలుగు రీమేక్ హక్కులను సురేష్ ప్రొడక్షన్స్ వారు తీసుకోడానికి ప్రయత్నాలు మొదలుపెట్టినట్లు వార్తలు వస్తున్నాయి. వెంకటేష్ - రానా లతో ఈ చిత్రాన్ని రీమేక్ చేసే ఆలోచన చేస్తున్నారని ఇంతకముందు ప్రచారం జరిగింది. ఇప్పుడు కొత్తగా మామా అల్లుళ్ళు వెంకటేష్ - నాగచైతన్య లతో రీమేక్ చేసే అవకాశం ఉందని టాక్ వినిపిస్తోంది. గతంలో సురేష్ బాబు నిర్మాణంలో వెంకీ - చైతూ లతో 'వెంకీ మామ' అనే సినిమా తీసి సక్సెస్ అందుకున్న సంగతి తెలిసిందే. ఈ క్రమంలో మలయాళ మూవీ రీమేక్ చేస్తారని అంటున్నారు.

'బ్రో డాడీ' సినిమాలో ఒక తండ్రి తన కొడుకుకు సోదరుడుగా స్నేహితుడిగా మారి అతని సమస్యను ఎలా పరిష్కరిస్తాడనేది చూపించారు. ఇది మామా అల్లుళ్ళు వెంకీ - నాగచైతన్య కంటే.. బాబాయ్ అబ్బాయ్ వెంకటేష్ - రానా లకు బాగా సెట్ అవుతుందని అభిమానులు భావిస్తున్నారు. మోహన్ లాల్ -పృథ్వీరాజ్ ల తండ్రీకొడుకుల పాత్రలు వీరిద్దరూ సరిగ్గా సరిపోతారని అంటున్నారు. సురేష్ బాబు ఈ సినిమాని రీమేక్ చేసేది నిజమా కాదా అనే దానిపై స్పష్టత వస్తే.. ఆ తర్వాత ఇందులో ఎవరెవరు నటిస్తారనేది తెలుస్తుంది.