బుచ్చిబాబు డ్రీమ్ నెర‌వేరేది అప్పుడేనా?

పంజా వైష్ణ‌వ్ తేజ్‌, కృతిశెట్టి జంట‌గా న‌టించిన 'ఉప్పెన‌' చిత్రం ఏ స్థాయి సంచ‌ల‌నాలు సృష్టించిందో తెలిసిందే. ఈ మూవీతో తొలి ప్ర‌య‌త్నంలోనే బ్లాక్ బ‌స్ట‌ర్ హిట్ ని సొంతం చేసుకున్నారు డైరెక్ట‌ర్ బుచ్చిబాబు సానా. ఈ సినిమాతో వంద కోట్ల క్ల‌బ్ లో చేరి స్టార్ డైరెక్ట‌ర్ ల జాబితాలోకి ప్ర‌వేశించారు. త‌దుప‌రి చిత్రంగా యంగ్ టైగ‌ర్ ఎన్టీఆర్ తో ఓ భారీ మూవీని ప్లాన్ చేసుకున్న విష‌యం తెలిసిందే. ఇందు కోసం ఎన్టీఆర్ కు లైన్ కూడా వినిపించిన బుచ్చిబాబు ప్ర‌స్తుతం ఆ లైన్ ని పూర్తి స్థాయి స్క్రిప్ట్ గా మ‌లుస్తున్నారు.

శ్రీ‌కాకుళం నేప‌థ్యంలో సాగే స్పోర్ట్స్ డ్రామాగా ఈ మూవీని తెర‌పైకి తీసుకురావాల‌న్న‌ది బుచ్చిబాబు ఆలోచ‌న‌. ఇందులో ఎన్టీఆర్ ఆర్ పాత్ర‌ని మ‌లిచిన తీరు కూడా ఈ ప్రాజెక్ట్ పై అంద‌రి దృష్టి ప‌డేలా చేసింది. 'పెద్ది' అనే టైటిల్ ని కూడా ఈ చిత్రానికి ఫైన‌ల్ కూడా చేశాడంటూ వార్త‌లు వినిపించాయి. అయితే ఈ ప్రాజెక్ట్ ప‌ట్టాలెక్కాలంటే మాత్రం బుచ్చి బాబు రెండేళ్లు వేచి చూడాల్సిందే అంటున్నారు.

యంగ్ టైగ‌ర్ ఎన్టీఆర్ ప్ర‌స్తుతం త‌న 30వ సినిమాని స్టార్ డైరెక్ట‌ర్ కొర‌టాల శివ‌తో చేయ‌బోతున్నారు. ఎన్టీఆర్ పుట్టిన రోజైన మే 20న ఈ మూవీకి సంబంధిచిన ఫ‌స్ట్ లుక్ డైలాగ్ మోష‌న్ పోస్ట‌ర్ ని చిత్ర బృందం విడుద‌ల చేసింది.

పాన్ ఇండియా లెవెల్లో ఈ మూవీని ఐదు భాష‌ల్లో విడుద‌ల చేయ‌బోతున్నామంటూ డైలాగ్ టీజ‌ర్ తో ప్ర‌క‌టించారు. దీంతో ఈ మూవీపై భారీ అంచ‌నాలు నెల‌కొన్నాయి. ట్రిపుల్ ఆర్ త‌రువాత చేస్తున్న‌ సినిమా కావ‌డంతో ఈ సినిమాపై ఎన్టీఆర్ భారీగానే ఎక్స్ పెక్టేష‌న్స్ పెట్టుకున్నాడు.

దీని త‌రువాత ఎన్టీఆర్ త‌న 31వ చిత్రాన్ని ప్ర‌శాంత్ నీల్ తో చేయ‌బోతున్న‌ట్టుగా ప్ర‌క‌టించిన విష‌యం తెలిసిందే. ఎన్టీఆర్ 30 తో పాటే ఎన్టీఆర్ 31 ఫ‌స్ట్ లుక్ ని కూడా విడుద‌ల చేశారు. కేజీఎఫ్ ఫేమ్ ప్రశాంత్ నీల్ తో చేయ‌నున్న సినిమా కావ‌డంతో ఈ ప్రాజెక్ట్ కూడా ఎన్టీఆర్ కు కీల‌కంగా మారింది. ఈ రెండు క్రేజీ ప్రాజెక్ట్ ల‌ని పూర్తి చేసి ప్రేక్ష‌కుల ముందుకు రావ‌డానికి ఎంత లేద‌న్నా రెండేళ్లు ప‌డుతుంది.

ఎన్టీఆర్ తో సినిమా చేయాలంటే బుచ్చిబాబు రెండేళ్లు వేచి చూడ‌క త‌ప్ప‌ద‌ని తెలుస్తోంది. ఈ లోగా వేరే హీరోతో సినిమా ప్లాన్ చేసుకోవాల‌ని బుచ్చిబాబు ప్లాన్ చేస్తున్నార‌ట‌. కొత్త హీరోతో వెళ్లాలా? లేక‌ స్టార్ హీరో తో వెళ్లాలా? అని త‌ర్జ‌న భ‌ర్జ‌న ప‌డుతున్నార‌ట‌. ఎన్టీఆర్ తో ఇప్ప‌ట్లో సినిమా సెట్స్ పైకి వెళ్లే అవ‌కాశం లేక‌పోవ‌డంతో స్టార్ హీరో డేట్స్ కోసం ఎదురుచూడాలా? లేక కొత్త హీరోతో సినిమా చేయాలా? అని ఆలోచ‌న‌లో ప‌డ్డార‌ట‌. ఏ హీరోతో సినిమా చేయ‌బోతున్నారు? ఎలాంటి ప్రాజెక్ట్ తో ముందుకు రానున్నార‌న్న‌ది త్వ‌ర‌లో నే బుచ్చిబాబు వెల్ల‌డించే అవ‌కాశం వుంద‌ని తెలిసింది.