ఉస్తాద్ రామ్ బుల్లెట్ ఫైరింగ్ వ‌చ్చేసింది

తెలుగు సినిమాల‌కు దేశ వ్యాప్తంగా క్రేజ్ ఏర్ప‌డ‌టంతో ప్ర‌తీ హీరో త‌న సినిమాలో ఏదో ఒక ప్ర‌త్యేక‌త వుండేలా ప్లాన్ చేసుకుంటున్నారు. పాటలు, నేప‌థ్య సంగీతం, ఫైట్స్ .. ఇలా ప్ర‌తీ దీ కొత్త‌గా వుండేలా ప్లాన్‌ చేసుకుంటున్నారు. అంద‌రిలాగే ఉస్తాద్ రామ్ కూడా త‌న త‌దుప‌రి చిత్రం విష‌యంలో కేర్ తీసుకుంటున్నారు. ఆన న‌టిస్తున్న తాజా చిత్రం `ది వారియ‌ర్‌`. యాక్ష‌న్ చిత్రాల ద‌ర్శ‌కులు ఎన్‌. లింగుసామి డైరెక్ట్ చేస్తున్నారు. రామ్ కు జోడీగా `ఉప్పెన‌` ఫేమ్ కృతిశెట్టి, అక్ష‌ర గౌడ హీరోయిన్ లుగా న‌టిస్తున్నారు.

హై ఓల్టేజ్ యాక్ష‌న్ ఎంట‌ర్ టైన‌ర్ గా రూపొందుతున్న ఈ మూవీని శ్రీ‌నివాస సిల్వ‌ర్ స్క్రీన్స్ బ్యాన‌ర్ పై శ్రీ‌నివాస చిట్టూరి నిర్మిస్తున్నారు. తొలి సారి ద్విపాత్రాభిన‌యం చేసిన `రెడ్‌` మూవీ ఆశించిన స్థాయిలో ఆక‌ట్టుకోలేక‌పోవ‌డంతో `ది వారియ‌ర్‌` పై భారీ అంచ‌నాలు పెట్టుకున్నారు. తెలుగు, త‌మిళ భాష‌ల్లో ఏక కాలంలో నిర్మాణం జ‌రుపుకుంటూ ద్విభాషా చిత్రంగా రూపొందుతోంది. ఇందులో హీరో రామ్ ప‌వ‌ర్ ఫుల్ పోలీస్ ఆఫీస‌ర్ గా న‌టిస్తున్నారు. హీరో ఆది పినిశెట్టి విల‌న్ గా న‌టిస్తున్నా ఈ మూవీ జూలై 14న విడుద‌ల కానుంది.

వాలెంటైన్స్ డే సంద‌ర్భంగా విడుద‌ల చేసిన హీరోయిన్ కృతిశెట్టి విజిల్ మ‌హాల‌క్ష్మీ లుక్ ప్రేక్ష‌కుల్ని విశేషంగా ఆక‌ట్టుకుంది. చాలా ప్ర‌త్యేక‌త‌ల‌తో తెర‌కెక్కుతున్నఈ మూవీ కోసం త‌మిళ హీరో శింబు చేత ప్ర‌త్యేకంగా `బుల్లెట్ సాంగ్` ని చిత్ర బృందం పాడింద‌చింది. రామ్ కు మంచి ఫ్రెండ్ అయినా శింబు ఈ పాట‌ని తెలుగు, త‌మిళ భాష‌ల్లో ఆల‌పించారు. శ్రీ‌మణి స్వ‌రాలు అందించ‌గా, దేవి శ్రీ ప్ర‌సాద్ సంగీతం అందించారు. శింబు తో పాటు ఈ పాట‌ని హ‌రి ప్రియ ఆల‌పించారు. చెన్నైలోని ఫీనిక్స్ మాల్ లో ఈ పాట‌కు సంబంధించిన లిరిక‌ల్ వీడియోని ప్ర‌త్యేకంగా తెలుగు, త‌మిళ భాష‌ల్లో శుక్ర‌వారం మేక‌ర్స్ విడుద‌ల చేశారు. ప్ర‌స్తుతం ఇందుకు సంబంధించిన వీడియో ప్ర‌స్తుతం నెట్టింట వైర‌ల్ గా మారింది.

భారీ సెట్ లో శేఖ‌ర్ వీజే మాస్ట‌ర్ నేతృత్వంలో చిత్రీక‌రించిన ఈ పాటలో రామ్ త‌న‌దైన స్టెప్పుల‌తో అద‌ర‌గొట్టేశాడు. టాలీవుడ్ లో వున్న టాప్ డ్యాన్సింగ్ సెన్సేష‌న్ ల‌లో ఒక‌రిగా రామ్ పేరు వినిపిస్తూ వుంటుంది. ఈ పాట మ‌రో రామ్ డ్యాన్సింగ్ సెన్సేష‌న్ అని మ‌రో సారి నిరూపించింది. ప‌ర్టికుల‌ర్ గా ఈ పాట‌లో రామ్ వేసిన రిబ్బ‌న్ స్టెప్ ఆక‌ట్టుకుంటోంది. ఇక సంగీత సంచ‌ల‌నం దేవి శ్రీ‌ప్ర‌సాద్ త‌న‌దైన సిగ్నేచ‌ర్ బీట్స్ తో మ‌రింత జోష్ ని నించేశాడు. కృతిశెట్టి కూడా రామ్ తో ఈ పాట‌లో పోటీప‌డి మ‌రి స్టెప్పులేయ‌డం విశేషం.

ప్ర‌స్తుతం చిత్రీక‌ర‌ణ ద‌శ‌లో వున్న ఈ మూవీపై హీరో రామ్ భారీ అంచ‌నాలు పెట్టుకున్నారు. ఇప్ప‌టికే విడుద‌ల చేసిన ఫ‌స్ట్ లుక్ పోస్ట‌ర్స్, హీరో రామ్ మేకోవ‌ర్‌, `ఇస్మార్ట్ శంక‌ర్` త‌రువాత ఆ త‌ర‌హా మాసీవ్ పాత్ర‌లో రామ్ న‌టిస్తున్న సినిమా కావ‌డం వంటి కార‌ణాల‌తో సినిమా పై మంచి బ‌జ్ క్రియేట్ అయింది. రెండు భాష‌ల్లోనూ ఈ మూవీతో స‌క్సెస్ ని సొంతం చేసుకోవాల‌ని రామ్ గ‌ట్టి ప‌ట్టుద‌ల‌తో వున్నారు. సీనియ‌ర్ డైరెక్ట‌ర్ భార‌తీరాజా, న‌దియా, చిరాగ్ జైన్‌, రెడిన్ కింగ్స్ లే త‌దిత‌రులు కీల‌క పాత్ర‌ల్లో న‌టిస్తున్నారు.