సెర్బియాలో గ్రాండ్ గా బన్నీ బర్త్ డే సెలబ్రేషన్స్..!

'పుష్ప' సినిమా సక్సెస్ తో పాన్ ఇండియా స్టార్ డమ్ ని సొంతం చేసుకున్న టాలీవుడ్ స్టార్ హీరో అల్లు అర్జున్ పుట్టినరోజు నేడు. దీంతో బన్నీ ఫ్యాన్స్ సోషల్ మీడియాలో తమ అభిమాన హీరోకి శుభాకాంక్షలు తెలుపుతూ పెద్ద ఎత్తున సంబరాలు చేస్తున్నారు.

బన్నీ 40వ పుట్టినరోజు సందర్భంగా సోషల్ మీడియాలో బర్త్ డే శుభాకాంక్షలు వెల్లువలా వచ్చి పడుతున్నాయి. మెగా ఫ్యామిలీ హీరోలతో పాటు ఇతర సినీ ప్రముఖులు ఐకాన్ స్టార్ కు విషెస్ అందజేస్తున్నారు. అయితే బన్నీ పుట్టినరోజును ఘనంగా జరుపుకోవడానికి తన భార్యా పిల్లలు మరియు సన్నిహితులు ఇతర కుటుంబ సభ్యులతో కలిసి సెర్బియాకు వెళ్లారు.

'పుష్ప' విజయం తర్వాత వచ్చిన తన బర్త్ డేను మరింత స్పెషల్ గా మార్చడానికి సెర్బియాలోని బెల్‌ గ్రేడ్‌ లో గ్రాండ్ గా పార్టీ ఏర్పాటు చేశారు అల్లు అర్జున్. దీని కోసం స్టార్ హీరోకి అత్యంత సన్నిహితులైన 50 మందిని తీసుకెళ్లినట్లు తెలుస్తోంది. వారితో కలిసి బన్నీ కేక్ కట్ చేసి సెలబ్రేషన్స్ చేసుకున్నారు.

సెర్బియాలో ఐకాన్ స్టార్ బర్త్ డే వేడుకలకు సంబంధించిన కొన్ని ఫోటోలు సోషల్ మీడియాలో చక్కర్లు కొడుతున్నాయి. ఇకపోతే అల్లు అర్జున్ తనకు శుభాకాంక్షలు తెలిపిన వారికి ధన్యవాదాలు చెబుతూ సోషల్ మీడియాలో హృదయపూర్వక నోట్‌ ను పంచుకున్నారు.

''అందరికీ నమస్కారం!.. ముందుగా, మీ అందరి శుభాకాంక్షలకు నేను అందరికీ థాంక్స్ చెప్పాలనుకుంటున్నాను. మీ ప్రేమ, ఆశీస్సులే నన్ను ఇంత దూరం తీసుకొచ్చాయి. ఈ 40 ఏళ్ల వయస్సులో నేను వెనక్కి తిరిగి చూసుకున్నప్పుడు, నా తల్లిదండ్రులు, కుటుంబం, స్నేహితులు, ఉపాధ్యాయులు, శ్రేయోభిలాషులు, నా ఫిలిం ఇండస్ట్రీ నా ప్రేక్షకులు, నా లవ్లీ స్పెషల్ ఫ్యాన్స్ మరియు నాపై అంతులేని ప్రేమను కురిపించిన వ్యక్తులందరి వల్ల నేను ఇలా ఉన్నాను''

''నా జీవితాన్ని తాకిన ప్రతి అనుభవానికి ఎనలేని కృతజ్ఞతలు. ఈ అందమైన అనుభవంలో భాగమైనందుకు ప్రతి ఒక్కరికీ ధన్యవాదాలు. వినయపూర్వకంగా... అనంతమైన కృతజ్ఞతతో.. ధన్యవాదాలు'' అని అల్లు అర్జున్ నోట్ లో పేర్కొన్నారు.