బన్నీ సరసన ఛాన్సా..! ఆహా.. ఆ ఊహ ఎంత బావుందీ..?

‘సాయి మంజ్రేకర్..’ ముంబై నుంచి ఇపోర్ట్ అయిన ఈ బ్యూటీ మహేష్ బాబు సినిమాలో నటిస్తోంది! అంటే.. మ‌హేష్ హీరో కాదు. ఆయ‌న నిర్మాతగా.. ‘గూఢచారి’ ఫేమ్ శశి కిరణ్ తిక్కా దర్శకత్వంలో తెరకెక్కుతున్న ‘మేజర్’ సినిమాలో నటిస్తోందీ బొంబాయి భామ.

అడవి శేష్ ప్రధాన పాత్ర పోషిస్తున్న ఈ సినిమా శరవేగంగా షూటింగ్ జరుపుకుంటోంది. ఈ మధ్యనే ఫస్ట్ లుక్ రిలీజ్ చేసిన యూనిట్.. సినిమా విడుదల తేదీ కూడా అనౌన్స్ చేసింది. జులై 2న ఈ మూవీ ప్రేక్షకుల ముందుకు రానున్నట్లు మహేష్ బాబుతోపాటు హీరో అడవి శేష్ ట్విటర్ ద్వారా వెల్లడించారు.

సూపర్‌స్టార్ మహేష్ బాబు నిర్మాణ సంస్థ జీఎంబీ ఎంటర్‌టైన్‌మెంట్స్ తోపాటు సోనీ పిక్చర్స్, ఏ ప్లస్ ఎస్ మూవీస్ బ్యానర్స్ సంయుక్తంగా ఈ సినిమాను నిర్మిస్తున్నాయి. 26/11 ముంబై ఉగ్రదాడిలో వీరమరణం పొందిన మేజర్ సందీప్ ఉన్ని కృష్ణన్ జీవిత కథ ఆధారంగా ఈ చిత్రం తెరకెక్కుతోంది. సాయి మంజ్రేకర్ తోపాటు, తెలుగు సోయగం శోభితా ధూళిపాళ్ల హీరోయిన్లుగా నటిస్తున్నారు.

అయితే.. ఇటీవల ఓ గుసగుస ఈ అమ్మడి చెవిన పడిందట. కొరటాల శివ దర్శకత్వంలో స్టైలిష్ స్టార్ అల్లు అర్జున్ ఓ సినిమా చేయబోతున్నారని, అందులో హీరోయిన్ గా ఈ ముంబై బ్యూటీని అనుకుంటున్నారన్నది ఆ గుసగుస సారాంశం.

ముంబైలో ఫ్లైట్ ఎక్కి.. హైదరాబాద్ లో ల్యాండ్ అయిన భామల్లో చాలా మంది స్టార్ హీరోయిన్లుగా ఎదిగారు. దీంతో.. సాయి మంజ్రేకర్ కూడా తెలుగులో సక్సెస్ కావాలని ప్రయత్నిస్తోంది. ఇలాంటి టైంలో వినిపించిన ఆ గుసగుస నిజమైతే ఎంత బాగుంటుంది కదా.. అంటోందీ బ్యూటీ. అంతేకాదు.. అల్లు అర్జున్ లాస్ట్ మూవీ ‘అల వైకుంఠపురములో’ చూశానని, వెంటనే ఆయన అభిమానిగా మారిపోయానని చెప్పింది.

కాగా.. ప్రస్తుతం అడవి శేషు ‘మేజర్’తోపాటు మెగా హీరో వరుణ్ తేజ్ చిత్రంలోనూ నటిస్తోందీ బ్యూటీ. వరుణ్ అప్ కమింగ్ మూవీ ‘ఘని’లో హీరోయిన్ ఛాన్స్ కొట్టేసింది సాయి మంజ్రేకర్. ఇక, బన్నీ చిత్రంలో కూడా ఛాన్స్ వస్తే ఎంతో బాగుంటుందని ఆశిస్తోందీ ముంబై భామ.