బాలయ్య సినిమా ప్రీ రిలీజ్ ఈవెంట్ కు చీఫ్ గెస్టుగా బన్నీ..!

బాక్సాఫీస్ వద్ద నువ్వా నేనా అంటూ పోటీపడే నందమూరి - మెగా ఫ్యామిలీ హీరోలు ఒకే వేదికను పంచుకోవడం సినీ అభిమానులకు ఎప్పుడూ ప్రత్యేకంగా ఉంటుంది. అలాంటి అరుదైన కలయికకు ఇప్పుడు ''అఖండ'' ప్రీ రిలీజ్ ఈవెంట్ వేదిక కాబోతోంది. నందమూరి బాలకృష్ణ - బోయపాటి శ్రీను కాంబినేషన్ లో తెరకెక్కుతున్న మోస్ట్ అవైటెడ్ మూవీ ఈవెంట్ ఈ నెల 27న హైదరాబాద్‌ లోని శిల్పకళా వేదికలో గ్రాండ్‌ గా జరగనుంది. అయితే ఈ వేడుకకు ఐకాన్ స్టార్ అల్లు అర్జున్ ముఖ్య అతిథిగా రానున్నట్లు మేకర్స్ తెలిపారు.

నందమూరి - అల్లు ఫ్యామిలీలకు మధ్య కొన్ని దశాబ్దాలుగా ప్రత్యేకమైన అనుబంధం ఉంది. ఇటీవల 'అన్ స్టాపబుల్' షో కర్టెన్-రైజర్ ఈవెంట్‌ లో సీనియర్ ఎన్టీఆర్ - అల్లు రామలింగయ్య మధ్య సాన్నిహిత్యాన్ని గుర్తు చేసుకుంటూ.. బాలకృష్ణ - అల్లు అరవింద్ ఒకరిపై ఒకరు స్నేహ భావాన్ని చూపించుకున్న సంగతి తెలిసిందే. ఇక అల్లు అర్జున్‌ కి బాలకృష్ణతో మంచి అనుబంధం ఉంది. అలానే బోయపాటి శ్రీనుతో బన్నీ 'సరైనోడు' వంటి బ్లాక్‌ బస్టర్ చిత్రానికి వర్క్ చేశారు. త్వరలో మరో క్రేజీ ప్రాజెక్ట్ కోసం కలబోతున్నారు. ఈ నేపథ్యంలోనే 'అఖండ' ప్రీ రిలీజ్ ఈవెంట్ కు బన్నీ చీఫ్ గెస్టుగా హాజరవుతున్నారు.

కాగా, 'అఖండ' చిత్రాన్ని ద్వారకా క్రియేషన్స్ బ్యానర్‌ పై మిర్యాల రవీందర్ రెడ్డి నిర్మిస్తున్నారు. ఇందులో బాలయ్య ద్విపాత్రాభినయం పోషిస్తున్నారు. బాలకృష్ణ సరసన ప్రగ్యా జైస్వాల్ హీరోయిన్‌ గా నటిస్తోంది. శ్రీకాంత్ - జగపతిబాబు - పూర్ణ కీలక పాత్రలు పోషిస్తున్నారు. ఇప్పటికే విడుదలైన రెండు పాటలు మరియు థియేట్రికల్ ట్రైలర్‌ కి అద్భుతమైన రెస్పాన్స్‌ లభించింది. ఎస్ఎస్ థమన్ ఈ చిత్రానికి సంగీతం సమకూర్చారు. సి రామ్ ప్రసాద్ సినిమాటోగ్రఫీ అందిస్తున్నారు. ఇప్పటికే అన్ని ఫార్మాలిటీస్ పూర్తి చేసుకున్న ఈ హై ఇంటెన్స్ యాక్షన్ ఎంటర్టైనర్ ని డిసెంబర్ 2న ప్రపంచ వ్యాప్తంగా విడుదల చేస్తున్నారు.