బన్నీ విజిట్.. మొన్న గీతా ఆర్ట్స్ ఆఫీస్.. నేడు మారుతి ఆఫీస్...!

కరోనా కారణంగా జనాలు ఒకప్పటిలా బయట తిరగటం లేదు. కాలు తీసి బయట పెట్టింది మొదలు ఎక్కడ ఎవరికి కరోనా వచ్చిందోనన్న భయంతోనే బతుకులు వెళ్లదీస్తున్నారు. ఇక సినీ సెలబ్రిటీలు అయితే షూటింగులు లేకపోవడంతో ఇంటికే పరిమితం అయ్యారు. ఐదు నెలల నుంచి ఇంట్లోనే ఉంటూ తమ ఫ్యామిలీతో ఎంజాయ్ చేస్తున్నారు. ఈ మధ్య ప్రభుత్వాలు షూటింగులకు నిబంధనలతో కూడిన అనుమతులు ఇచ్చినప్పటికీ స్టార్ హీరోలెవరూ షూటింగులకు వెళ్లే సాహసం చేయడం లేదు. ఈ క్రమంలో అల్లు అర్జున్ మాత్రం అప్పుడప్పుడు అలా బయటకు వస్తున్నాడు. ఇంట్లోనే ఉంటూ బోర్ కొట్టిందో ఏమో తెలియదు కానీ.. ఇటీవల తమ నిర్మాణ సంస్థ అయిన గీతా ఆర్ట్స్ ఆఫీసుకు వెళ్లారు. దీనికి సంబంధించిన ఫొటోల‌ను బన్నీ అభిమానుల‌తో పంచుకున్నారు. ఇదే క్రమంలో తన సతీమణి స్నేహరెడ్డితో కలిసి బయటకు వెళ్లిన ఫోటోలు కూడా సోషల్ మీడియాలో చక్కర్లు కొట్టాయి.

ఇప్పుడు తాజాగా అల్లు అర్జున్ డైరెక్టర్ మారుతి ఆఫీస్ ని సందర్శించారు. ఇండస్ట్రీలో అల్లు అర్జున్ - మారుతి మంచి ఫ్రెండ్స్ అనే విషయం అందరికి తెలిసిందే. మల్టీ మీడియా నేర్చుకుంటున్నప్పటి నుంచీ వాళ్ల మధ్య అనుబంధం అలానే కొనసాగుతోంది. సందర్భం వచ్చినప్పుడల్లా దాని గురించి చెప్తూ ఉంటారు. ఈ క్రమంలో మారుతి ఆఫీసుకు వెళ్ళాడు బన్నీ. మారుతి ఆఫీస్ అంతా తిరిగిన బన్నీ పరిసరాలను ఆస్వాదించారు. అల్లు అర్జున్ మారుతితో కలిసి ఉన్న ఫోటోలు సోషల్ మీడియాలో స్ప్రెడ్ అవుతున్నాయి. ఈ ఫోటోలలో బన్నీ బ్లాక్ టీ షర్ట్ ధరించి గ‌డ్డంతో తన 'పుష్ప' స్టైల్ లో ఉన్నాడు. కాకపోతే డిఫ‌రెంట్ హెయిర్ స్టైల్‌.. పెరిగిన జుట్టు కనిపించకుండా బన్నీ కవర్ చేసుకున్నాడు. కొత్త లుక్‌ లో బ‌న్నీని చూసిన అభిమానులు సంబరపడిపోతున్నారు.