థ్రిల్లింగ్ గా అనుపమ 'బటర్ ఫ్లై' టీజర్..!

మలయాళ బ్యూటీ అనుపమ పరమేశ్వరన్ ప్రధాన పాత్రలో నటిస్తున్న తాజా చిత్రం ''బటర్‌ ఫ్లై''. ఇటీవల అనుపమ పుట్టినరోజు సందర్భంగా విడుదలైన ఫస్ట్ లుక్ పోస్టర్ అందరి దృష్టిని ఆకర్షించింది. సీతాకోకచిలుక మధ్యలో అందమైన అనుపమ లుక్ ఆకట్టుకుంది. ఈ క్రమంలో తాజాగా టీజర్ ను చిత్ర యూనిట్ రిలీజ్ చేసింది.

ఎలాంటి డైలాగ్స్ లేకుండా కేవలం 40 సెకన్లతో ఉత్కంఠ భరితంగా 'బటర్ ప్లై' టీజర్‌ ను కట్ చేశారు. కథ మొత్తం ఆమె పాత్ర చుట్టూనే తిరుగుతుందని ఈ వీడియోని బట్టి తెలుస్తోంది. ఓ అపార్ట్‌మెంట్‌ లోకి అడుగుపెట్టిన అనుపమ.. అక్కడ షాకింగ్ పరిస్థితులను ఎదుర్కోవాల్సి వచ్చింది.

ఎవరో ఆమెను తరుముతున్నట్లు.. ఆమె ఎవరి కోసమే వెతుకుతున్నట్లు టీజర్ లో చూపించారు. బ్యాగ్రౌండ్ స్కోర్ - విజువల్స్ స్పెషల్ గా థ్రిల్లింగ్ కు గురి చేస్తున్నాయి. ఈ 'బటర్ ప్లై' వెనకున్న అసలు కథేంటో తెలియాలంటే సినిమా రిలీజ్ అయ్యే వరకు ఆగాల్సిందే.

''బటర్ ప్లై'' చిత్రానికి ఘంటా సతీష్ బాబు కథ - స్క్రీన్‌ ప్లే - దర్శకత్వం వహించారు. జెన్ నెక్స్ట్ మూవీస్ బ్యానర్‌ పై రవి ప్రకాష్ బోడపాటి - ప్రసాద్ తిరువళ్లూరి - ప్రదీప్ నల్లిమెల్లి సంయుక్తంగా నిర్మిస్తున్నారు.

ఇందులో భూమిక చావ్లా - నిహాల్ కీలక పాత్రలు పోషిస్తున్నారు. అర్విజ్ - గిడియన్ కట్టా ఈ చిత్రానికి సంగీతాన్ని అందించగా.. సమీర్‌ రెడ్డి సినిమాటోగ్రఫీ నిర్వహించారు. విజయ్ మక్కెన ఆర్ట్ డైరెక్టర్ గా.. మధు ఎడిటర్ గా వర్క్ చేస్తున్నారు. ఈ ప్రాజెక్ట్ గురించి మరిన్ని అప్‌ డేట్స్ ను మేకర్స్ త్వరలోనే వెల్లడించనున్నారు.