ఇప్పటికిప్పుడు నరేష్‌ తో ఎందుకనో..

ఈ మధ్య కాలంలో అల్లరి నరేష్‌ సినిమాలేవీ బాక్సాఫీస్‌ దగ్గర వర్కవుట్‌ కావట్లేదు. అప్పుడెప్పుడో వచ్చిన సుడిగాడు సినిమా తప్పిస్తే.. ఆ తరువాత సుడి తిరిగిందే లేదు. లోపం ఎక్కడుందీ అనే విషయం పక్కనెట్టేస్తే.. ఇంకా నరేష్‌ కు మాత్రం మార్కెట్‌ అలా స్థిరంగానే ఉంది. సో.. సరైన సినిమా పడితే మాత్రం.. మనోడు దూసుకుపోతాడంతే.

మరి ఇదే విషయాన్ని రియలైజ్‌ అయ్యారో ఏంటో.. సడన్‌ గా పెద్ద సినిమాల నిర్మాత బి.వి.ఎస్‌.ఎన్‌.ప్రసాద్‌ ఇప్పుడు నరేష్‌ మీద గురి పెట్టారు. ఈ మధ్య కాలంలో అత్తారింటికి దారేది - నాన్నకు ప్రేమతో వంటి కమర్షియల్‌ సక్సెస్‌ అయిన సినిమాలను తీసిన 'ఛత్రపతి' ప్రసాద్‌.. ఇప్పుడు అసలు సడన్‌ స్టార్‌ పై ఫోకస్‌ చేశారంటేనే ఫిలిం నగర్‌ అవాక్కయ్యింది.

నిజానికి తాను తీసిన పెద్ద పెద్ద సినిమాలన్నీ ఎంత పెద్ద హిట్టయినా కూడా.. అవన్నీ కాస్ట్‌ ఫెయిల్యూర్స్‌ అంటూ ఒక రూమర్‌ వినిపిస్తోంది. కాబట్టి ప్రసాద్‌ కు పెద్దగా లాభాలు వచ్చిందేమీ లేదట. అందుకే ఇప్పుడు లో-బడ్జెట్‌ లో నరేష్‌ తో ఓ సినిమాను తీసి.. తాను ఆర్ధికంగా పుంజుకోవడానికే ఈ స్కెచ్‌ అంటున్నారు. దర్శకుడు జి.నాగేశ్వర్‌ రెడ్డి ఈ సినిమాను డీల్‌ చేస్తున్నారని తెలుస్తోంది.