అది పండితే బాలయ్య సినిమా హిట్టే

నందమూరి బాలకృష్ణ.. మరోసారి సంక్రాంతి సింహంగా మారిపోతున్నారు. ఆయన నటించిన జైసింహా చిత్రం ఈ నెల 12న గ్రాండ్ రిలీజ్ కాబోతోంది. టీజర్ నుంచి ట్రైలర్ వరకూ.. అన్ని యాంగిల్స్ లోను పక్కా మాస్ మసాలా మూవీ అని చెప్పేసిన జై సింహా మేకర్స్.. ఇప్పుడు ప్రమోషన్స్ విషయంలో కూడా మహా యాక్టివ్ గా ఉన్నారు. నిజానికి సంక్రాంతి చిత్రాలలో దేనికీ జరగనంత ఎక్కువ ప్రచారం జైసింహాకే చేస్తున్నారు. ఇంటర్వ్యూలు.. టీజర్లు.. ప్రోమోలతో జైసింహా హడావిడి మామూలుగా లేదు.

ఇప్పుడు నిర్మాత సి.కళ్యాణ్ స్వయంగా రంగంలోకి దిగి మరీ జైసింహాకు ప్రమోషన్స్ చేస్తుండడం విశేషం. నయనతార.. ప్రకాష్ రాజ్ ల పాత్రలు ఈ చిత్రంలో కీలకంగా ఉంటాయని.. వారు లేకపోతే ఈ సినిమా ఉండదేమో అనేంత ఆసక్తి కలిగించేలా వాళ్ల రోల్స్ ఉంటాయని చెప్పారు సి కళ్యాణ్. మొదటగా అనుష్కను హీరోయిన్ గా అనుకున్నా.. ఆమె డేట్స్ ఇవ్వలేకపోవడంతో నయనతారను అప్రోచ్ అయినట్లు చెప్పారు నిర్మాత. ఇందులో బాలయ్య వేసిన స్టెప్స్ రామ్ చరణ్ - అల్లు అర్జున్ లకు ధీటుగా ఉంటాయని చెప్పిన మాటలు విని అభిమానుల కాళ్ళు భూమి మీద నిలవడం లేదు. అంతే కాదు.. ఈ మూవీకి యాక్షన్ ఎపిసోడ్స్ తో పాటు ఫ్లాష్ బ్యాక్ హైలైట్ అవుతుందని అన్నారాయన.

బాలకృష్ణ మూవీలో ఫ్లాష్ బ్యాక్ పండిందంటే ఆ సినిమా బ్లాక్ బస్టర్ అవడం ఆనవాయితీ అన్న సి కళ్యాణ్.. ఇప్పటివరకూ బాలయ్య సినిమాలు అన్నిటిలోనూ ఈ ఫ్లాష్ బ్యాక్ హైలైట్ అవుతుందని చెప్పాడు. సినిమా మీద నమ్మకంతో తమిళ్ లో కూడా రిలీజ్ చేద్దామని భావించినా.. ఈ చిత్రాన్ని తమిళ్ లో రీమేక్ చేసే యోచనలో దర్శకుడు ఉండడంతో.. ఆగిపోయినట్లు చెప్పారు ప్రొడ్యూసర్.