సంఘమిత్ర.. ఇప్పుడేం చేస్తారు?

సంఘమిత్ర.. ‘బాహుబలి’ని కొట్టే సినిమాగా తమిళ జనాలు ప్రచారం చేసుకుంటున్న చిత్రం. కానీ ‘బాహుబలి’ లాగా ఆరంభం నుంచి ఈ సినిమా ప్రేక్షకుల దృష్టిని ఆకర్షించలేకపోతోంది. రాజమౌళి లాగా దర్శకుడు సుందర్‌ కు గొప్ప ట్రాక్ రికార్డేమీ లేదు. ‘సంఘమిత్ర’ లాంటి సినిమాను అతను డీల్ చేయగలడా అన్న సందేహాలు వ్యక్తమవుతున్నాయి. దీనికి తోడు ఈ చిత్రానికి ఎంచుకున్న నటీనటుల విషయంలోనూ జనాలకు అభ్యంతరాలున్నాయి.

రెండు మూడు భాషల్లో ఫాలోయింగ్ ఉన్న పెద్ద స్టార్లను కాకుండా జయం రవి, ఆర్యలను కథానాయకులుగా ఎంచుకోవడం సినిమాకు పెద్ద మైనస్ అంటున్నారు. ఇప్పుడివన్నీ చాలవన్నట్లు కోలీవుడ్.. టాలీవుడ్.. బాలీవుడ్ అని తేడా లేకుండా అన్ని చోట్లా గుర్తింపు ఉన్న శ్రుతి హాసన్ కూడా ఈ సినిమా నుంచి తప్పుకుంది. ఇప్పటిదాకా ‘సంఘమిత్ర’కు ఉన్న ఆకర్షణ అంటే సంగీత దర్శకుడు ఎ.ఆర్.రెహమాన్.. హీరోయిన్ శ్రుతి హాసన్ మాత్రమే.

‘సంఘమిత్ర’ తరహా సినిమాకు శ్రుతి ఎంతమేరకు సూటవుతుందో అన్న సందేహాలు కొంత మేర ఉన్నప్పటికీ.. ఆమెకున్న నేషనల్ వైడ్ ఫాలోయింగ్ సినిమాకు కలిసొస్తుందని భావించారు. ఇప్పుడు ఆమె ఈ సినిమా నుంచి వైదొలిగింది. ‘సంఘమిత్ర’ మీద నమ్మకం కుదరక.. తనకు ఈ సినిమా వల్ల ఏమేరకు లాభం ఉంటుందో అన్న సందేహాలతోనే శ్రుతి ఈ సినిమా నుంచి తప్పుకున్నట్లు తెలుస్తోంది. ఇక ‘సంఘమిత్ర’ టీం ముందున్న ఆప్షన్స్.. అనుష్క, నయనతార.

ఐతే ఇప్పటికే ‘రుద్రమదేవి’ - ‘బాహుబలి’ - ‘సైజ్ జీరో’ లాంటి సినిమాల కోసం ఏళ్లకు ఏళ్లు కష్టపడ్డ అనుష్క ఈ సినిమాకు ఓకే చెబుతుందా అన్నది సందేహమే. నయనతార సైతం రెండేళ్ల పాటు ‘సంఘమిత్ర’ సినిమాకు డేట్లు కేటాయించి పని చేయడం సందేహమే. రాజమౌళి లాంటి దర్శకుడైతే ఎంత కాలమైనా పర్వాలేదని నటీనటులు ముందుకొస్తారు కానీ.. సుందర్‌ ను నమ్మి స్టార్ హీరోయిన్లు భారీగా డేట్లు ఇవ్వడం కష్టమే. మరి ఈ పరిస్థితుల్లో ‘సంఘమిత్ర’ టీం కథానాయికగా ఎవరిని ఎంచుకుంటుందో చూడాలి. స్టార్ హీరోలు దొరక్క జయం రవి, ఆర్యలతో సర్దుకుపోయినట్లే.. హీరోయిన్ విషయంలో రాజీ పడతారేమో చూడాలి.

Like Us on Facebook : https://www.facebook.com/Tupakidotcom/