కంచె బ్యూటీకి ఈసారైనా అఖండ విజయం దక్కేనా..?

నందమూరి బాలకృష్ణ - బోయపాటి శ్రీను కాంబినేషన్ లో తెరకెక్కుతున్న యాక్షన్ ఎంటర్టైనర్ ''అఖండ''. ద్వారకా క్రియేషన్స్ పతాకంపై మిర్యాల రవీందర్‌ రెడ్డి ఈ చిత్రాన్ని నిర్మిస్తున్నారు. ఇందులో కుర్రాభామ ప్రగ్యా జైస్వాల్ ఒక హీరోయిన్ గా నటిస్తోంది. షూటింగ్ చివరి దశలో ఉన్న 'అఖండ' తాజా షెడ్యూల్ కు ప్యాకప్ చెప్పానని ప్రగ్యా ఇన్ స్టాగ్రామ్ వేదికగా వెల్లడించారు. హైదరాబాద్ పరిసర ప్రాంతాల్లో జరిగిన ఈ షూటింగ్ లో బాలకృష్ణ - ప్రగ్యా మధ్య కొన్ని కీలక సన్నివేశాలను చిత్రీకరించినట్లు సమాచారం.

'డేగ' అనే సినిమాతో సినీ ఇండస్ట్రీలో అడుగుపెట్టిన ప్రగ్యా జైస్వాల్.. 'కంచె' సినిమాతో మంచి గుర్తింపు తెచ్చుకుంది. అయినప్పటికీ ఈ బ్యూటీకి ఆశించిన స్థాయిలో అవకాశాలు రాలేదనే చెప్పాలి. అందాలు ఆరబోసినా కూడా ఎందుకో కానీ ఈ భామకు అదృష్టం మాత్రం కలిసి రాలేదు. ఈ క్రమంలో 'జ‌య జాన‌కి నాయ‌క‌' సినిమాలో సెకండ్ హీరోయిన్ ఛాన్స్ ఇచ్చిన దర్శకుడు బోయపాటి.. ఇప్పుడు 'అఖండ' సినిమాలో బాలయ్య సరసన నటించే అవకాశం ఇచ్చాడు. ఈ సినిమా సక్సెస్ పై ప్రగ్యా ఎన్నో ఆశలు పెట్టుకుందని తెలుస్తోంది.

కాగా, 'అఖండ' సినిమాలో సీనియర్ హీరో శ్రీకాంత్ విలన్ గా నటిస్తున్నాడు. హీరోయిన్ పూర్ణ కీలక పాత్ర పోషిస్తోంది. థమన్ ఈ చిత్రానికి మ్యూజిక్ అందిస్తున్నాడు. మే 28న ఈ సినిమాని విడుదల చేస్తామని మేకర్స్ ప్రకటించినప్పటికీ.. కరోనా నేపథ్యంలో వాయిదా పడే అవకాశాలు ఉన్నాయని అంటున్నారు. ఇక ఇటీవలే విడుదలైన 'అఖండ' టీజర్ టాలీవుడ్ రికార్డులని తిరగరాసింది. యూట్యూబ్ లో తక్కువ సమయంలో 50 మిలియన్ల వ్యూస్ దక్కించుకున్న టీజర్ గా సరికొత్త రికార్డు క్రియేట్ చేసింది.