యంగ్ హీరోకి పాన్ ఇండియా ఇమేజ్ సొంతం చేసుకునే సత్తా ఉందా..?

వర్సటైల్ హీరో అడివి శేష్ తన కెరీర్ లో ఫస్ట్ పాన్ ఇండియా మూవీ 'మేజర్' విడుదల కోసం ఆసక్తిగా ఎదురుచూస్తున్నారు. రిలీజ్ కు రెడీ అయిన ఈ సినిమా కోసం దూకుడుగా ప్రమోషన్స్ చేస్తున్నారు. ముంబై 26/11 ఉగ్రదాడులలో వీరమరణం పొందిన ఎన్ఎస్జి కమాండో మేజర్ సందీప్ ఉన్నికృష్ణన్ స్ఫూర్తిదాయకమైన జీవితం ఆధారంగా ఈ సినిమా రూపొందింది.

'మేజర్' చిత్రానికి శేష్ అన్నీ తానై చూసుకున్నారు. కథ - స్క్రీన్ ప్లే కూడా యువ హీరోనే రాసుకున్నారు. కరోనా పాండమిక్ కారణంగా ఈ సినిమా విడుదల కోసం ఎక్కువ సమయం వేచి ఉండాల్సి వచ్చింది. జూన్ 3న థియేటర్లలోకి రాబోతున్న ఈ బయోపిక్ పై మంచి అంచనాలు ఉన్నాయి. ఇప్పటికే ప్రదర్శించబడిన ప్రివ్యూలతో ఈ చిత్రానికి పాజిటివ్ టాక్ వచ్చింది.

'మేజర్' రిలీజ్ తర్వాత అడివి శేష్ మరో పాన్ ఇండియా మూవీ 'గూఢచారి 2' పై దృష్టి పెట్టనున్నారు. ఇది 2018లో వచ్చిన బ్లాక్ బస్టర్ స్పై థ్రిల్లర్ 'గూఢచారి' కి సీక్వెల్. రెండేళ్ల క్రితం అధికారికంగా ప్రకటించబడిన ఈ ప్రాజెక్ట్ కు రాహుల్ పాకాల దర్శకత్వం వహించనున్నారు. శేష్ స్వయంగా దీనికి స్క్రిప్ట్ రాసుకుంటున్నారు. అతని బృందంతో స్క్రిప్ట్ సెషన్స్ లో పాల్గొనడానికి రెడీ అవుతున్నారని తెలుస్తోంది.

'గూఢచారి 2' చిత్రాన్ని ఈ ఏడాది చివర్లో సెట్స్ మీదకు తీసుకెళ్తారని భావిస్తున్నారు. శ్రీచరణ్ పాకాల సంగీతం సమకూర్చనున్న ఈ సీక్వెల్ కు అబ్బూరి రవి డైలాగ్స్ అందించనున్నారు. త్వరలో నటీనటులు, సిబ్బందిని ఖరారు చేయనున్నారు. ఏకే ఎంటర్టైన్మెంట్స్ - పీపుల్ మీడియా ఫ్యాక్టరీ - అభిషేక్ అగర్వాల్ ఆర్ట్స్ ఈ ప్రతిష్టాత్మక ప్రాజెక్ట్ ను నిర్మించనున్నాయి.

'గూడాచారి 2' చిత్రం యొక్క అధిక భాగం షూటింగ్ విదేశాలలో జరగనుంది. నిర్మాతలు దీని కోసం భారీ బడ్జెట్ ను కేటాయించారని తెలుస్తోంది. 'మేజర్' చిత్రాన్ని దృష్టిలో పెట్టుకొని పాన్ ఇండియా స్థాయిలో ఈ సినిమాని ప్లాన్ చేస్తున్నారని సమాచారం. వినూత్నమైన చిత్రాలతో తనకంటూ ప్రత్యేకమైన గుర్తింపు తెచ్చుకున్న శేష్.. పాన్ ఇండియా స్టార్ గా మారుతారేమో చూడాలి.

ఇకపోతే శేష్ ప్రధాన పాత్రలో నటించిన 'హిట్ 2: ది సెకండ్ కేస్' సినిమా పోస్ట్ ప్రొడక్షన్ పనులు చివరి దశలో ఉన్నాయి. ఇది సూపర్ హిట్ 'హిట్' సినిమాకు సీక్వెల్. ఇందులో హిట్ (హొమిసైడ్ ఇంటర్వెన్షన్ టీమ్) ఆఫీసర్ కృష్ణ దేవ్ అలియాస్ కె.డి పాత్రలో శేష్ కనిపించనున్నారు. హీరో నాని నిర్మిస్తున్న ఈ చిత్రానికి శైలేష్ కొలను దర్శకత్వం వహిస్తున్నారు. జూలై 29న ఈ సీక్వెల్ చిత్రాన్ని విడుదల చేయడానికి మేకర్స్ సన్నాహాలు చేస్తున్నారు.