‘పెళ్ళిచూపులు’ తర్వాత ఇదే అంటున్నారు

మంచి కంటెంట్ ఉండాలే కానీ.. అందరూ కొత్తవాళ్లు కలిసి చేసిన ప్రయత్నాలకు కూడా టాలీవుడ్లో మంచి సపోర్టే దొరుకుతోంది. ‘పెళ్ళిచూపులు’ సినిమా ఇలా వెలుగులోకి వచ్చింది. కొత్తదనం ఉన్న కథను ఎంచుకుని.. ట్రెండుకు తగ్గట్లుగా డిఫరెంటుగా సినిమా తీస్తే.. పెద్ద బేనర్ల నుంచి సపోర్ట్ అందుకోవడానికి అవకాశముంది. ‘పెళ్ళిచూపులు’ చిత్రానికి ఇలాగే సురేష్ ప్రొడక్షన్స్ మంచి వేదికగా నిలిచింది. ఈ చిత్రాన్ని బాగా ప్రమోట్ చేసి పెద్ద హిట్ చేసింది. ఈ కోవలోనే ‘కేరాఫ్ కంచర్ల పాలెం’ కూడా ట్రెండ్ సెట్టర్ అయ్యే అవకాశాలున్నాయని ఇండస్ట్రీలో డిస్కషన్ నడుస్తోంది. ఈ చిత్రం గత ఏడాదే చిత్రీకరణ పూర్తి చేసుకుంది. న్యూయార్క్ ఫిలిం ఫెస్టివల్లో ప్రదర్శితమై ప్రశంసలు అందుకుంది. ఇప్పటికే చాలామంది టాలీవుడ్ సెలబ్రెటీలు ఈ సినిమా చూసి ఇంప్రెస్ అయ్యారు.

ఆ జాబితాలో రాజమౌళి.. కీరవాణి.. క్రిష్ లాంటి ప్రముఖులుండటం విశేషం. జక్కన్న అయితే ఈ సినిమాను తెగ పొగిడేశాడు. తాను మామూలుగా సినిమా నచ్చితే నచ్చిందని చెబుతానని.. కానీ ఈ సినిమాను మాత్రం అందరూ చూడాలని చెబుతున్నానని రాజమౌళి చెప్పడం విశేషం. కీరవాణి.. క్రిష్ కూడా ఇలాగే సినిమా గురించి చాలా పాజిటివ్ గా మాట్లాడారు. ఇంకా చాలామందికి షోలు వేయనున్నారట. మీడియా వాళ్లకు కూడా ‘పెళ్ళిచూపులు’ తరహాలోనే ‘కేరాఫ్ కంచెర్లపాలెం’ ముందస్తు షోలు ప్రదర్శించనున్నారట. ఇలా సినిమా గురించి జనాలకు బాగా తెలిసేలా చేసి హైప్ పెంచాలనుకుంటున్నారు. వెంకటేష్ మహా అనే కొత్త దర్శకుడు.. కంచెర్లపాలెం అనే ఊరిలో అక్కడి జనాల్నే పెట్టి ఈ సినిమా తీయడం విశేషం. దగ్గుబాటి రానా ఈ చిత్రాన్ని ‘సురేష్ ప్రొడక్షన్స్’ బేనర్ మీద సమర్పిస్తున్నాడు.