అనామికా... నిన్ను చూడాలిక‌!

ఇన్నాళ్లూ మ‌న‌కు `బాహుబ‌లి` గుర్తుకొచ్చిన వెంట‌నే మ‌రో సినిమా కూడా మ‌న‌సులో మెదిలేది. అదే.. `రుద్ర‌మ‌దేవి`. `బాహుబ‌లి`కీ, `రుద్ర‌మ‌దేవి`కీ చాలా పోలిక‌లున్నాయి. రెండూ కూడా చారిత్రాత్మ‌క క‌థ‌లే. జాన‌ప‌దం త‌ర‌హాలోనే రెండూ సాగుతాయి. యుద్ధ స‌న్నివేశాలు కూడా రెండింట్లో నూ భారీగా ఉంటాయి. గ్రాఫిక్స్‌ తో పాటు రానా, అనుష్క‌లాంటి తార‌లు కూడా `రుద్ర‌మ‌దేవి`లో ఉన్నారు. గుణ‌శేఖ‌ర్ త‌న సొంత ప్రొడ‌క్ష‌న్‌ లో తీసిన ఈ సినిమాపై భారీగా అంచ‌నాలున్నాయి. ఇటీవ‌ల విడుద‌ల చేసిన ట్రైల‌ర్‌ కి ట్రెమండ‌స్ రెస్పాన్స్ వ‌చ్చింది. అద‌నంగా ఈ సినిమాని త్రీడీలో చూపించ‌బోతున్నాడు గుణ‌. ఆ త్రీడీ కూడా క‌ళ్ల‌ద్దాలు లేకుండానే క‌నిపిస్తుంద‌ట. ఎన్ని స్పెషాలిటీస్ ఉన్నాయి క‌దూ!

అన్న‌ట్టు భారీ బ‌డ్జెట్‌ తో తెర‌కెక్కిన ఈ సినిమా లో బోలెడంతమంది తార‌లు ఉన్నారు. అనుష్క‌, రానా, అల్లు అర్జున్‌, నిత్య‌మీన‌న్‌, కేథ‌రిన్‌, కృష్ణంరాజు, ప్ర‌కాష్‌రాజు, హంసానందిని... ఇలా ఈ జాబితా ఇంకా చాలా పొడ‌వుగానే ఉంటుంది. కాక‌తీయ వంశం చ‌రిత్ర‌ తో రాసుకొన్న బ‌ల‌మైన క‌థ‌ తో పాటు, బ‌ల‌మైన తారాగ‌ణం కూడా ఉండ‌టం తో సినిమాపై ప్ర‌త్యేక‌మైన ఆస‌క్తి వ్య‌క్త‌మ‌వుతోంది. వ‌చ్చే నెల‌లో `రుద్ర‌మ‌దేవి`ని విడుద‌ల చేస్తార‌ని తెలుస్తోంది. గుణ‌శేఖ‌ర్ ఇప్ప‌టికే ప్ర‌మోష‌న్ కార్య‌క్ర‌మాల్ని మొద‌లుపెట్టాడు. ఆన్‌ లైన్‌ లో క్ర‌మం త‌ప్ప‌కుండా `రుద్ర‌మ‌దేవి`లోని పాత్ర‌ల్ని ప‌రిచ‌యం చేస్తున్నాడు. మొన్న‌టిదాకా ప్ర‌కాష్‌రాజ్‌, కృష్ణంరాజు పాత్ర‌లకి సంబంధించిన లుక్స్‌ ని విడుద‌ల చేశాడు. ఇప్పుడు అనామిక పాత్ర చేసిన కేథ‌రిన్ లుక్‌ ని విడుద‌ల చేశాడు. అందులో కేథ‌రిన్ ఘాటైన అందాల‌తో మ‌తి పోగొడుతోంది. స్టిల్లు లో కేథ‌రిన్ లుక్కు చూసేస‌రికి `అనామిక‌.. నిన్ను చూడాలిక` అంటున్నారు కుర్రాళ్లు. నిత్య‌మీన‌న్, హంసానందిని కూడా ఇదే త‌ర‌హా లో ఘాటుగానే క‌నిపించ‌బోతున్నార‌ని స‌మాచారం.