కాంబినేషన్లు సరే.. సినిమా ఎప్పుడు తేజా?

దశాబ్ద కాలం నుంచి తన ప్రతి సినిమా గురించి చాలా కబుర్లే చెబుతున్నాడు డైరెక్టర్ తేజ. అతను ఏదేదో చెప్పడం.. తెరమీద ఇంకేదో చెప్పడం. తాజాగా ‘హోరాహోరీ’ విషయంలో అయితే పెద్ద పెద్ద మాటలే మాట్లాడాడు. కానీ ‘జయం’ సినిమాకు ఇంకో వెర్షన్ లాగా కనిపించిన ఈ సినిమాను ప్రేక్షకులు తిప్పి కొట్టారు. దీని తర్వాత ఓ సైన్స్ ఫిక్షన్ అని.. రాజశేఖర్ ప్రధాన పాత్రలో ‘అహం’ అని.. రెండు మూడు ప్రాజెక్టులు వినిపించాయి. కానీ అవి కార్యరూపం దాల్చలేదు.

కొన్ని రోజులుగా రానా దగ్గుబాటి-కాజల్ అగర్వాల్ కాంబినేషన్లో తేజ సినిమా చేయబోతున్నట్లు వార్తలొచ్చాయి. ఇది కూడా కన్ఫమా కాదా అన్న సంగతి తేలడం లేదు. ఇంతలో ఈ చిత్రంలో మరో హీరోయిన్ అంటూ ఓ వార్త తెరమీదికి వచ్చింది. ఇందులో కాజల్ తో పాటు కేథరిన్ థ్రెసా కూడా మరో కథానాయికగా నటించబోతోందట. ఇదొక పొలిటికల్ డ్రామా అని.. దగ్గుబాటి సురేష్ బాబు నిర్మిస్తారని.. అనూప్ రూబెన్స్ సంగీతాన్నందిస్తాడని అంటున్నారు.

ఐతే ఈ ప్రాజెక్టులో ఉన్నట్లు చెబుతున్న వాళ్లందరూ తేజతో సినిమా చేయడానికి ఒప్పుకోవడం ఆశ్చర్యం కలిగించే విషయమే. ఇప్పటికే తేజను నమ్మిన చాలామంది గట్టి ఎదురు దెబ్బలు తిన్నారు. ‘బాహుబలి’ తర్వాత గొప్ప ఇమేజ్ సంపాదించిన రానాను సురేష్.. తేజ చేతికి అప్పగించడం.. స్వయంగా సినిమాను నిర్మించడానికి ముందుకు రావడం నమ్మశక్యం కాని విషయమే. ఇంతకీ ఈ ప్రాజెక్టు ఎప్పుడు మొదలవుతుందన్నది మాత్రం క్లారిటీ లేదు. తేజ నిజంగానే ఈ సినిమాను మొదలుపెట్టి.. తన మీద పెట్టుకున్న నమ్మకాన్ని ఈసారైనా నిలబెడతాడేమో చూడాలి.