సరైనోడితో కేథరిన్ కథకళి

మళయాళీ భామ కేథరిన్ థెరెసా ఆరేళ్లుగా సౌత్ అంతా తిరిగేస్తోంది. కన్నడ ఇండస్ట్రీలో అరంగేట్రం చేసిన మొదటి రెండేళ్లు మళయాళంలోనే అదృష్టం పరీక్షించుకుంది. ఆ తర్వాత తెలుగు - కన్నడ సినిమాలను ఒకేసారి చేస్తూ వచ్చింది. చమ్మక్ చల్లో అన్నా - ఇద్దరమ్మాయిలతో చిత్రంలో ఒక అమ్మాయిగా నటించినా, ఎర్రబస్సు ఎక్కినా.. పెద్దగా ప్రయోజనం దక్కలేదు.

టాలీవుడ్ లో చెప్పుకోదగిన సంఖ్యలోనే సినిమాలు చేసినా బ్రేక్ రాలేదు. తర్వాత కోలీవుడ్ లో పాగా వేసేసి, వరుసగా ఆఫర్స్ దక్కించేసుకుంది. ఇప్పుడు స్టార్ హీరో విశాల్ సరసన కేథరిన్ నటించిన కథకళి రిలీజ్ కు రెడీ అయింది. రుద్రమదేవిలో ఈ భామ కనిపించినా, జనాలు అంతగా గుర్తించేంత పాత్రేం కాదు. ఇప్పుడు తమిళ్ మూవీ కథకళి తెలుగులోనూ రిలీజ్ కానుండడంతో.. మరోసారి టాలీవుడ్ పై ఆశలు పెంచుకుంటోంది. మరోవైపు ఈ చిత్రంతో కేథరిన్ పక్కా మిడిల్ క్లాస్ అమ్మాయిగా మెరవనుంది. సినిమా అంతా పంజాబీ డ్రస్సులతో, అతి తక్కువ మేకప్ తో.. తనలోని పెర్ఫామెన్స్ ను బయటపెడుతోంది.

అసలు తన అందాలను విచ్చలవిడిగా ఆరబోసేందుకు ఏ మాత్రం అభ్యంతరం చెప్పని ఈ చిన్నదానికి.. ఇప్పటివరకూ అదృష్టం కలిసి రాలేదని చెప్పాలి. కానీ 2016 మాత్రం ఈ భామకు చాలా స్పెషల్ అని చెప్పాలి. జనవరిలో విశాల్ కథకళి రిలీజ్ కానుండగా.. బన్నీతో రెండోసారి జతకట్టిన సరైనోడు కూడా దాదాపు పూర్తి కావచ్చింది. మార్చిలో సరైనోడు విడదలయ్యే అవకాశాలున్నాయని టాక్. ఈ రెండింటిలో ఏ ఒక్కటి హిట్ అయినా.. కేథరిన్ కెరీర్ కథకళి ఆడినట్లే..