స్టార్లను ఏడిపించిన అజాత శత్రువు

నిన్న రాత్రి గుండెనొప్పితో హఠాత్తుగా మరణించిన కన్నడ సీనియర్ స్టార్ హీరో అంబరీష్ కు ఘన నివాళులు అందుతున్నాయి. తన మన అనే భేదం లేకుండా కర్ణాటక రాష్ట్రం నలుమూలల నుంచి కదిలివస్తున్న జనంతో బెంగుళూరు వీధులు కిక్కిరిసిపోతున్నాయి. కంఠీరవ స్టేడియంలో ఉంచిన ఆయన పార్ధీవ దేహాన్ని సందర్శించేందుకు వచ్చిన పెద్ద స్టార్లు సైతం దుఃఖాన్ని దిగమింగుకోలేక కన్నీరు పెట్టుకోవడం అందరికి కదిలిస్తోంది.

మెగా స్టార్ చిరంజీవి కాసేపటి క్రితం అంబరీష్ కు నివాళి అర్పించి సుమలతను ఓదార్చే క్రమంలో తాను కూడా కన్నీటి పర్యంతం కావడం అక్కడఉన్నవాళ్ళ హృదయాలను బరువెక్కించింది. భార్య సురేఖతో పాటు వెళ్లిన చిరు కళ్ళను తుడుచుకోవడం మీడియా దృష్టి దాటి పోలేదు. ఇక మంచు విష్ణుతో పాటు వచ్చిన కలెక్షన్ కింగ్ మోహన్ బాబు అంబరీష్ మృతదేహం ఉన్న బాక్సు అద్దం మీద భోరుమని విలపిస్తుంటే ఓదార్చడం ఎవరి తరం కాలేదు. సుమలతను హత్తుకుని ఓదారుస్తున్నప్పుడు కన్నీరు ధారగా వస్తూనే ఉంది. చాలా నిబ్బరంగా ఉండే మోహన్ బాబు ఇంత విలపించడం గతంలో ఎన్నడూ లేదనే చెప్పొచ్చు.

ఇక రజనీకాంత్ సైతం దీనికి మినహాయింపు కాలేదు. సుమలత ఓదార్చే క్రమంలో ఆయన కళ్ళు చెమ్మగిల్లాయి. ఈగ విలన్ సైరాలో అరకు రాజుగా నటిస్తున్న సుదీప్ అంబరీష్ కు అత్యంత ఆప్తుడు. పదే పదే ఉబికి వస్తున్న కన్నీళ్లను తుడుచుకున్న సుదీప్ అంబరీష్ చివరి చిత్రం నిర్మాత. అది ఇటీవలే విడుదలై మంచి విజయాన్ని సాధించింది. ముఖ్యమంత్రి కుమారస్వామి సైతం చాలా సార్లు కన్నీటిపాలయ్యారు. అజాత శత్రువుగా పేరున్న అంబరీష్ మరణం ఇంత పెద్ద స్టార్లను సైతం కదిలించింది అంటే ఆయనకు వీళ్ళతో ఉన్న అనుబంధం ఎంత గొప్పదో అర్థమవుతోంది