విశాల్ నిశ్చితార్థం.. పెళ్లి ఆ భ‌వంతిలో?

మొన్న‌నే త‌మిళ హీరో ఆర్య ఓ ఇంటివాడ‌య్యాడు. ఇంత‌లోనే అత‌డి ఫ్రెండు హీరో విశాల్ కూడా ఓ ఇంటివాడు కాబోతున్నాడు. తాజాగా హైద‌రాబాద్ లోని ఓ ప్ర‌ముఖ ఐదు న‌క్ష‌త్రాల హోట‌ల్లో సైలెంట్ గా విశాల్ నిశ్చితార్థం పూర్త‌యింది. విశాల్ - న‌టి అనీశా రెడ్డి ప్రేమాయ‌ణం.. పెద్ద‌ల అంగీకారం గురించి తెలిసిందే. ఆ క్ర‌మంలోనే ఈ జంట‌కు తొంద‌ర్లోనే పెళ్లి జ‌ర‌గ‌నుంద‌ని ఇదివ‌ర‌కూ వార్త‌లొచ్చాయి. ఆ ప్ర‌కారమే ఈ జంట పెళ్లికి ముహూర్తం ఖ‌రారు చేశార‌ట‌. అలాగే శుక్ర‌వారం రాత్రి వీరి నిశ్చితార్థం పూర్త‌యింది. ఈ వేడుక‌లో ప‌లువురు టాలీవుడ్ స్టార్లు స‌హా - కోలీవుడ్ సెల‌బ్రిటీలు .. రాజ‌కీయ రంగ ప్ర‌ముఖులు.. పారిశ్రామిక వేత్త‌లు హాజరయ్యారు.

విశాల్ - అనీశా నిశ్చితార్థం అనంత‌రం దిగిన ఫోటోలు ప్ర‌స్తుతం సామాజిక మాధ్య‌మాల్లో జోరుగా వైర‌ల్ అవుతున్నాయి. సెప్టెంబర్‌లో ఈ జంట‌ వివాహం జరుగ‌నుంద‌ని తెలుస్తోంది. త్వరలో తాళి క‌ట్టు ముహూర్తాన్ని అధికారికంగానూ ఖ‌రారు చేస్తార‌ట‌. న‌డిగ‌ర సంఘం సొంత భ‌వంతి నిర్మించి అందులోనే పెళ్లాడ‌తాన‌న్న విశాల్ ఆ ఏర్పాట్ల‌లోనూ ఉన్నార‌ని తెలుస్తోంది.

విశాల్ అత్త‌మామ‌ల బ్యాక్ గ్రౌండ్ గురించి తెలిసిందే. ఆళ్ల అనీశా రెడ్డి పారిశ్రామిక వేత్త కుమార్తె. న‌ట‌న‌పై ఫ్యాష‌న్ తో అర్జున్ రెడ్డి, పెళ్లిచూపులు వంటి చిత్రాల్లో అతిధి పాత్ర‌ల్లో న‌టించారు. ఆ క్ర‌మంలోనే విశాల్ తో స్నేహం, ప్రేమ‌.. అటుపై పెద్ద‌ల్ని ఒప్పించి పెళ్లి చేసుకుంటున్నారు.ఇక నిశ్చితార్థ‌ వేడుక‌లో తమిళ నటులు కార్తీ, మనోబాల, కుట్టి పద్మిని, శ్రీమన్, సౌందర్ రాజా త‌దిత‌రులు పాల్గొన్నారు. ఫోటోల్లో మ‌ల‌యాళ సూప‌ర్ స్టార్ మోహ‌న్ లాల్ క‌నిపిస్తున్నారు. ఇక విశాల్ ప‌లు తెలుగు - త‌మిళ్ ద్విభాషా చిత్రాల్లో న‌టిస్తూ ఇరు చోట్లా మార్కెట్ ని అందుకున్నాడు. 2018 లో విశాల్ న‌టించిన ప‌లు చిత్రాలు విజ‌యం సాధించాయి. ప్ర‌స్తుతం అయోగి అనే చిత్రంలో న‌టిస్తున్నాడు. టాలీవుడ్ బ్లాక్ బ‌స్ట‌ర్ టెంప‌ర్ కి త‌మిళ రీమేక్ ఇది. త‌దుప‌రి పందెంకోడి 3, అభిమ‌న్యుడు 3 చిత్రంలోనూ విశాల్ న‌టించ‌నున్నాడు.