'సీతారామం' సెన్సార్‌ రిపోర్ట్‌ ఇదుగో..!

మలయాళ స్టార్ హీరో దుల్కర్ సల్మాన్ హీరోగా హను రాఘవపూడి దర్శకత్వంలో రూపొందిన సీతారామం సినిమా విడుదలకు సిద్ధం అయ్యింది. ఆగస్టు 5వ తారీఖున భారీ ఎత్తున విడుదల కాబోతున్న సీతారామం సినిమా కు సంబంధించిన సెన్సార్‌ కార్యక్రమాలు పూర్తి అయినట్లుగా చిత్ర యూనిట్‌ సభ్యులు అధికారికంగా ప్రకటించారు.

సినిమా కు క్లీన్ యూ సర్టిఫికెట్‌ వచ్చింది. ఈమధ్య కాలంలో క్లీన్‌ యూ సర్టిఫికెట్స్ రావడం అనేది చాలా అరుదుగా చూస్తున్నాం. మినిమం మాస్ ఎలిమెంట్స్ ఉన్నా కూడా యూ/ఎ ఇస్తున్నారు. సినిమా లో ఎలాంటి యాక్షన్ కానీ రొమాంటిక్ ఎలిమెంట్స్ లేని కారణంగానే సినిమా కు క్లీన్‌ యూ ఇచ్చినట్లుగా తెలుస్తోంది. సెన్సార్‌ బోర్డు నుండి కూడా పాజిటివ్‌ రెస్పాన్స్ వచ్చిందట.

సెన్సార్‌ క్లియర్‌ అయిన నేపథ్యంలో సినిమా ను మరింత యాక్టివ్ గా ప్రమోట్‌ చేసేందుకు సిద్ధం అయ్యారు. ఇప్పటికే యూనిట్‌ సభ్యులు విభిన్నంగా సినిమా ను ప్రమోట్ చేస్తూ ఉన్నారు. సినిమా ప్రమోషన్స్ ను వచ్చే వారం నుండి మరింత గా యాక్టివ్‌ చేయాలని భావిస్తున్నారు.

ఈ సినిమా లో ఉన్న రష్మిక మందన్నా ను ఫుల్ గా వినియోగించుకునేందుకు మేకర్స్ ప్రమోషన్స్ ను ప్లాన్‌ చేస్తున్నారు. కమర్షియల్‌ హీరోయిన్ గా టాప్ పొజీషన్ లో ఉన్న ఈ అమ్మడు సీతరామం సినిమా లో హీరోయిన్ గా కాకుండా క్యారెక్టర్ ఆర్టిస్ట్ గా నటించిన నేపథ్యంలో ఆ పాత్ర గురించి సర్వత్రా ఉత్కంఠ నెలకొంది.

అందమైన రష్మిక మందన్న తో పాటు ఈ సినిమా లో దుల్కర్ సల్మాన్ కు జోడీగా మృణాల్ ఠాకూర్ నటించింది. ప్రేమ అనేది ఒక యుద్ధం అంటూ హను రాఘవపూడి చేస్తున్న ప్రమోషన్స్ యూత్‌ ఆడియన్స్ లో మంచి అంచనాలు పెంచాయి.

లవ్‌ స్టోరీస్ ను హను రాఘవపూడి డీల్ చేసే విధానం బాగుంటుంది. అందుకే సీతారామం సినిమా ప్రతి ఒక్కరి హృదయాలకు హత్తుకునేలా ఉంటుందనే అభిప్రాయం వ్యక్తం అవుతోంది.