#OTT లో హారర్ అతీంద్రియ శ‌క్తుల‌తో చై ప్ర‌యోగం

ఓటీటీ వేదిక‌ల‌పై గొప్ప స‌క్సెస్ రేటు ఉన్న హార‌ర్ థ్రిల్ల‌ర్ కం అతీంద్రీయ శ‌క్తుల కాన్సెప్టుతో అనేక వెబ్ సిరీస్ లు వ‌చ్చాయి. ఇప్పుడు అదే బాట‌లో అక్కినేని నాగ‌చైత‌న్య అతీంద్రీయ శ‌క్తుల నేప‌థ్యం.. హార‌ర్ కంటెంట్ ఉన్న వెబ్ సిరీస్ లో న‌టిస్తున్నార‌ని తెలిసింది. అగ్ర హీరోలంతా ఓటీటీ వేదిక‌ల‌పై సిరీస్ ల‌తో బిజీ అవుతున్న వేళ చైత‌న్య ఈ ప్ర‌యోగంతో ఆక‌ట్టుకోబోతున్నాడు. ఇటీవ‌ల‌ నాగ చైతన్య వెబ్ సిరీస్ తో OTTలో అరంగేట్రం చేయడానికి సిద్ధంగా ఉన్నాడని క‌థ‌నాలు రాగా దానిపై నెమ్మ‌దిగా క్లారిటీ వ‌చ్చేస్తోంది. అమెజాన్ ప్రైమ్ వీడియో నిర్మించే సిరీస్ కి విక్రమ్ కె కుమార్ దర్శకత్వం వహిస్తార‌ని గుస‌గుస‌లు వినిపిస్తున్నాయి.

ప్రస్తుతం విక్రమ్- నాగ చైతన్య బృందం థాంక్యూ అనే సినిమా చేస్తున్నారు. ఈ మూవీ నిర్మాణానంత‌ర ప‌నుల్ని పూర్తి చేసిన వెంటనే విక్రమ్ ఈ సిరీస్ ని సెట్స్‌పైకి తీసుకువెళతాడని సమాచారం. ఇందులో తమిళ నటి ప్రియా భవానీ శంకర్ కథానాయికగా నటిస్తుంది. ప‌లువురు ప్ర‌ముఖ సౌత్ న‌టీన‌టులు కూడా ఈ సిరీస్ లో న‌టిస్తార‌ని స‌మాచారం.

2022 జనవరిలో సిరీస్ చిత్రీక‌ర‌ణ ప్రారంభం కానుంది. ఇందులో తన పాత్ర కోసం నాగ‌చైత‌న్య‌ మేకోవర్ ట్రై చేయ‌నున్నార‌ని తెలిసింది. అతని కెరీర్ లో ఇదే తొలి హారర్‌ ప్రాజెక్ట్‌. ఈ వెబ్ సిరీస్ కి సంబంధించిన మరిన్ని వివరాలు త్వరలో ప్రకటించనున్నారు. హిందీ -తెలుగు స‌హా ప‌లు భాషలలో ప్రీమియర్ అవుతుంది. మ‌రోవైపు కింగ్ నాగార్జున తో క‌లిసి చైత‌న్య బంగార్రాజు లో న‌టిస్తున్నారు. నాగార్జున సైతం ఓటీటీ సిరీస్ ల‌లో ప్ర‌వేశించ‌నున్నార‌ని క‌థ‌నాలు వెలువ‌డిన సంగ‌తి తెలిసిందే.