శోభిత తో డేటింగ్ రూమర్స్ పై చైతూ స్పందన..!

టాలీవుడ్ యంగ్ హీరో అక్కినేని నాగచైతన్య వ్యక్తిగత జీవితం గురించి ఇంతకముందు అనేక రూమర్స్ వినిపించాయి. సమంత రూత్ ప్రభుతో విడిపోయిన తర్వాత చైతూ మళ్లీ ప్రేమలో పడ్డారని.. 'మేజర్' బ్యూటీ శోభిత దూళిపాళ్ల‌తో డేటింగ్ చేస్తున్నట్లు బాలీవుడ్ మీడియాలో పుకార్లు పుట్టుకొచ్చాయి. అయితే ఈ రూమ‌ర్స్ పై యువసామ్రాట్ తాజాగా స్పందించారు.

నాగచైతన్య 'లాల్‌ సింగ్ చ‌డ్డా' సినిమాతో బాలీవుడ్‌ లో అడుగుపెట్టబోతున్న సంగతి తెలిసిందే. ఆమిర్‌ ఖాన్ - కరీనా కపూర్ ఖాన్ జంటగా నటించిన ఈ సినిమాలో చై కీలక పాత్ర పోషించారు. అద్వైత్ చంద‌న్ ద‌ర్శ‌క‌త్వంలో తెరకెక్కిన ఈ ఎమోషనల్ కామెడీ ఎంటర్టైనర్ ఆగ‌స్ట్ 11న పాన్ ఇండియా స్థాయిలో విడుదల కాబోతోంది. ఈ నేపథ్యంలో మూవీ ప్రమోషన్స్ లో భాగంగా వరుసగా ఇంటర్వ్యూలు ఇస్తూ వస్తున్నారు చైతూ.

ఓ ఇంట‌ర్వ్యూలో ర్యాపిడ్ ఫైర్ లో భాగంగా 'శోభిత దులిపాళ్ల పేరు విన‌గానే మీకు గుర్తొచ్చేది ఏంటి?' అని అడగ్గా.. నాగచైతన్య నవ్వేశారు. ఆ తర్వాత "నేను జస్ట్ నవ్వుతాను" అని బదులిచ్చారు. సింపుల్ గా తనదైన శైలిలో ఒక స్మైల్ ఇచ్చి, ఎప్పటిలాగే గాసిప్స్ ను నేను పట్టించుకోను అనే విధంగా సమాధానమిచ్చినట్లు అర్థం అవుతోంది.

నిజానికి ఇటీవల 'థాంక్యూ' మూవీ ప్రమోషన్స్ లో కూడా శోభిత తో డేటింగ్ రూమర్స్ పై నాగచైతన్య స్పందించలేదు. కానీ అది నేషనల్ మీడియాలో వచ్చిన గాసిప్ కావడంతో.. అదే మీడియాలో పరోక్షంగా దీనిపై రియాక్ట్ అయ్యాడని అభిమానులు కామెంట్స్ చేస్తున్నారు. ఏదేమైనా బాలీవుడ్ మీడియా మాత్రం చైతూ డేటింగ్ రూమర్స్ ను వదలడం లేదు. దాన్నే పట్టుకొని వేలాడుతూ ఉందని.. దానికి తగ్గట్టుగానే చై ఆన్సర్ ఇచ్చారని స్పష్టంగా తెలుస్తోంది.

ఇకపోతే ఇదే ఇంటర్వ్యూలో హీరో విజయ్ దేవరకొండ పేరు చెప్పగా.. 'క్రేజీ' అని సమాధానం ఇచ్చారు చైతన్య. అలానే హీరోయిన్ రాశీ ఖన్నా పేరు చెప్పగా 'మంచి ఫ్రెండ్' అని బదులిచ్చాడు. కత్రినా కైఫ్ తన సెలబ్రిటీ క్రష్ అని చైతూ తెలిపారు. ఆమె అందంగా ఉంటుందని.. ఆమె ఎక్కడ మొదలుపెట్టి ఇప్పుడు ఎక్కడ ఉందో తాను చూశానని అన్నారు. ఒక యాక్టర్ గా ఒక డ్యాన్సర్ గా అన్ని విధాలుగా ఆమె ఎదిగిన విధానం గొప్పదిగా పేర్కొన్నారు.

అలానే తాను ఎక్కువగా అభిమానించే ఇద్దరు యాక్టర్స్ జూనియర్ ఎన్టీఆర్ మరియు రామ్ చరణ్ అని నాగ చైతన్య చెప్పుకొచ్చారు. 'లాల్‌ సింగ్‌ చ‌డ్డా' సినిమా ఫలితాన్ని బట్టి భ‌విష్య‌త్తులో బాలీవుడ్‌ లో మ‌రిన్ని సినిమాలు చేస్తాన‌ని అన్నారు. గతంలో ఓ హిందీ ప్రాజెక్ట్ ను రిజెక్ట్ చేయడం గురించి మాట్లాడుతూ.. "ఈ రోజు నేను వెనక్కి తిరిగి చూసుకున్నప్పుడు.. ప్రతిదీ ఒక కారణంతో జరుగుతుందని నేను భావిస్తున్నాను. మన తిరస్కరణలు వైఫల్యాలు మనకు సహాయం చేయాలి. నా అన్ని వైఫల్యాలకు నేను చాలా కృతజ్ఞుడను" అని చై చెప్పారు.

స్టార్ కిడ్ అవడం గురించి స్పందిస్తూ.. ''ఓపెన్‌ గా చెప్పాలంటే ఈ ఫ్లాట్ ఫార్మ్ లో మంచి బిగినింగ్ కు సహాయ పడుతుంది. ఆ విషయంలో నేను అదృష్టవంతుడననే చెప్పాలి. కానీ ఇది చాలా బాధ్యతతో కూడుకున్నది. ఎందుకంటే మనం విఫలమైనప్పుడు.. ఆ వైఫల్యాలు బాగా హైలైట్ చేయబడతాయి. చాలా ఎక్కువ. విమర్శలు కూడా చాలా ఎక్కువగా వస్తాయి. ఈరోజుల్లో మన చుట్టూ చాలా టాలెంట్ ఉంది.. మీకు తగినన్ని అవకాశాలు ఇవ్వడం లేదు. ఎవరైనా సరే.. చివరకు అంతా సమానమే'' అని మెచ్యూర్ ఆన్సర్ ఇచ్చారు నాగచైతన్య.

కాగా, 'ఫారెస్ట్ గంప్' అనే హాలీవుడ్ సినిమా రీమేక్ గా 'లాల్ సింగ్ చడ్డా' తెరకెక్కింది. ఇందులో బాలరాజు బోడి అనే సౌత్ ఇండియన్ గా.. ఆర్మీ ఆఫీసర్ గా నాగచైతన్య కనిపించనున్నారు. ఇప్పటికే విడుదలైన ప్రమోషనల్ కంటెంట్ తో చైతూ నార్త్ ఆడియన్స్ దృష్టిని ఆకర్షించారు. తన పాత్ర కోసం చాలా హార్డ్ వర్క్ చేసినట్లు మేకింగ్ వీడియో చూస్తే అర్థం అవుతుంది. అమీర్ ఖాన్ స్వీయ నిర్మాణంలో రూపొందిన ఈ చిత్రాన్ని తెలుగులో మెగాస్టార్ చిరంజీవి సమర్పిస్తున్నారు.