చైతూ ఆశ‌ల‌న్నీ బైలింగ్వ‌ల్ మూవీ పైనే!

నాగ‌చైత‌న్య‌కు ఈ ఏడాది ప్రారంభం నుంచి అస్స‌లు క‌లిసి రావ‌డం లేదు. బ్యాక్ టు బ్యాక్ ఫ్లాపుల‌తో స‌త‌మ‌త‌మ‌వుతున్నారు. నాగ‌చైత‌న్య న‌టించిన రొమాంటిక్ డ్రామా `థాంక్యూ`. స్టార్ ప్రొడ్యూస‌ర్ దిల్ రాజు నిర్మాణంలో `మ‌నం` ఫేమ్ విక్ర‌మ్ కె. కుమార్ తెర‌కెక్కించారు. రాశిఖ‌న్నా, మాళ‌విక నాయ‌ర్‌, అవికా గోర్ హీరోయిన్ లుగా న‌టించారు. వివిధ ద‌శ‌ల్లో సాగే ఓ ప్రేమికుడి జ‌ర్నీ నేప‌థ్యంలో ఈ మూవీని రూపొందించారు.

ఇప్ప‌టికే ఇదే త‌ర‌హా క‌థ‌ల‌తో ప్రేమ‌మ్‌, నా ఆటో గ్రాఫ్ స్వీట్ మెమోరీస్‌` వంటి సినిమాలు రావ‌డంతో ఈ మూవీని ప్రేక్ష‌కులు పెద్ద‌గా ఆద‌రించ‌లేదు. జూలై 22న విడుద‌లైన ఈ మూవీ నాగ‌చైత‌న్య‌కు బిగ్ షాకిచ్చింది. ఉభ‌య తెలుగు రాష్ట్రాల‌లో భారీ స్థాయిలో విడుద‌లైన ఈ మూవీ కోసం ఏపీలోని కొన్ని ఏరియాల్లో ఒక‌టి కొంటే మ‌రో టికెట్ ఫ్రీ అనే ఆఫ‌ర్ పెట్టిన ప్రేక్ష‌కులు థియేట‌ర్ల వైపు క‌న్నెత్తి చూడ‌క‌పోవ‌డం గ‌మ‌నార్హం.

ఈ మూవీ త‌రువాత నాగ‌చైత‌న్య అతిథి పాత్ర‌లో న‌టించిన బాలీవుడ్ మూవీ `లాల్ సింగ్ చ‌డ్డా`. బాలీవుడ్ మిస్ట‌ర్ ప‌ర్ ఫెక్ట్ అమీర్ ఖాన్ హీరోగా న‌టించి అద్వైత్ చంద‌న్ ద‌ర్శ‌క‌త్వంలో రూపొందిన ఈ మూవీ కూడా బాక్సాఫీస్ వ‌ద్ద ఆక‌ట్టుకోలేక‌పోయింది. దేశ వ్యాప్తంగా ఈ మూవీపై బాయ్ కాట్ వివాదం చెల‌రేగ‌డంతో అమీర్ కెరీర్ లోనే `లాల్ సింగ్ చ‌డ్డా` అత్యంత భారీ డిజాస్ట‌ర్ గా నిలిచింది. త‌ను న‌టించిన తొలి బాలీవుడ్ మూవీ కావ‌డంతో చైతూ భారీగా డిస్ట్ర‌బ్ అయ్యాడ‌ట‌.

అయితే తాజాగా వ‌రుస ఫ్లాపుల నుంచి తేరుకున్ననాగ‌చైత‌న్య తొలిసారి చేయ‌బోతున్న బైలింగ్వ‌ల్ మూవీ కోసం రెడీ అవుతున్న‌ట్టుగా తెలుస్తోంది. త‌మిళ ద‌ర్శ‌కుడు వెంక‌ట్ ప్ర‌భు ద‌ర్శ‌క‌త్వంలో నాగ‌చైత‌న్య ఓ ద్వి భాషా చిత్రాన్ని చేయ‌బోతున్న విష‌యం తెలిసిందే. శ్రీ‌నివాస సిల్వ‌ర్ స్క్రీన్స్ బ్యాన‌ర్ పై శ్రీ‌నివాస చిట్టూరి ఈ మూవీని నిర్మించ‌బోతున్నారు. బేబ‌మ్మ కృతిశెట్టి హీరోయిన్ గా న‌టిస్తున్న ఈ మూవీకి యువ‌న్ శంక‌ర్ రాజా సంగీతం అందిస్తున్నారు.

NC22 అనే వ‌ర్కింగ్ టైటిల్ తో రూపొంద‌నున్నఈ మూవీకి సంబంధించిన పూజా కార్య‌క్ర‌మాల‌ను జూన్ లో లాంఛ‌నంగా పూర్తి చేశారు. సెప్టెంబ‌ర్ 5 నుంచి రెగ్యుల‌ర్ షూటింగ్ ని ప్రారంభించ‌బోతున్నార‌ట‌. కృతిశెట్టికి, నాగ‌చైత‌న్య‌కు ఈ మూవీ అత్యంత కీల‌కంగా మారింది. ఈ మూవీలో హీరో నాగ‌చైత‌న్య ప‌వ‌ర్ ఫుల్ పోలీస్ ఆఫీస‌ర్ పాత్ర‌లో క‌నిపించ‌నున్నారు. ఈ మూవీకి సంబంధించిన మ‌రిన్ని విర‌వాల్ని చిత్ర బృందం త్వ‌ర‌లో అధికారికంగా వెల్ల‌డించ‌నుంద‌ని తెలిసింది.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.