శిరీష్-వీఐ ఆనంద్.. నిర్మాత అతనే

‘ఎక్కడికి పోతావు చిన్నవాడా’ సినిమాతో ఒక్కసారిగా టాలీవుడ్ మోస్ట్ వాంటెడ్ దర్శకుల్లో ఒకడైపోయాడు వీఐ ఆనంద్. అతడితో పని చేయడానికి చాలామంది ఆసక్తితో ఉన్నారు. ఆల్రెడీ ఆనంద్ తో సినిమాకు కమిట్మెంట్ తీసుకున్న అల్లు శిరీష్ ఇప్పుడు చాలా ఖుషీగా ఉండే ఉంటాడు. ఈ సినిమాకు నిర్మాత ఎవరనే విషయంలో కొంచెం సందిగ్ధత ఉంది మొన్నటి వరకూ. ఐతే ‘ఎక్కడికి పోతావు చిన్నవాడా’ సూపర్ హిట్ టాక్ తో మొదలవడంతో ‘స్వామి రారా’ నిర్మాత చక్రి చిగురుపాటి లైన్లోకి వచ్చేశాడు. వీఐ ఆనంద్-శిరీష్ సినిమాను తనే నిర్మించనున్నట్లు ప్రకటించాడు.

శిరీష్ కోసం ఆనంద్ రెడీ చేసింది సైన్స్ ఫిక్షన్ సబ్జెక్టు. దీనికి బడ్జెట్ కొంచెం ఎక్కువే అవుతుందట. ఐతే శిరీష్-ఆనంద్ కాంబినేషన్ మీద అంత బడ్జెట్ పెట్టొచ్చా అన్న సందిగ్ధతలో ఉన్నాడు నిర్మాత. ఓ దశలో చక్రి ఈ సినిమా నుంచి తప్పుకుంటాడని.. మరో నిర్మాత కోసం ప్రయత్నించాల్సి రావచ్చని కూడా వార్తలొచ్చాయి. ఐతే ‘ఎక్కడికి పోతావు చిన్నవాడా’ ఆనంద్ స్టామినా ఏంటో చూపించింది. అతడి మీద భరోసా ఉంచొచ్చని రుజువు చేసింది. దీంతో ఏమాత్రం ఆలస్యం చేయకుండా చక్రి చిగురుపాటి ఈ సినిమాను ఓకే చేశాడు. అనౌన్స్ మెంట్ కూడా ఇచ్చేశాడు. ప్రస్తుతం శిరీష్.. మలయాళంలో మోహన్ లాల్ కాంబినేషన్లో ఒక సినిమా చేస్తున్నాడు. అది పూర్తి చేశాక ఈ సినిమాను మొదలుపెడతాడు. ప్రస్తుతం ఆనంద్ పూర్తి స్థాయి స్క్రిప్టు తయారు చేసే పనిలో ఉన్నాడు.