ముందే శాటిలైట్ అయిపోయిందా?

కొన్నేళ్ల కిందటి వరకు కొత్త సినిమాల శాటిలైట్ కోసం ఛానెళ్ల మధ్య గట్టి పోటీ నెలకొనేది కానీ.. ఈ మధ్య అంత డిమాండ్ ఉండట్లేదన్నది మార్కెట్ వర్గాల మాట. ఛానెళ్లు సినిమాల కొనుగోలు విషయంలో ఆచితూచి వ్యవహరిస్తున్నట్లు చెబుతున్నారు. క్రేజ్ ఉన్న సినిమాల విషయంలోనూ తొందర పడట్లేదు. జాగ్రత్తగా డీల్స్ సెట్ చేసుకుంటున్నారు. చాలా వరకు సినిమా రిలీజయ్యాక ఫలితం చూసి ఒప్పందాలు చేసుకుంటున్నారు. ఇలాంటి తరుణంలోనూ కొన్ని సినిమాలకు మాత్రం బంపర్ డీల్స్ తగులుతున్నాయి. ఈ గురువారమే ప్రేక్షకుల ముందుకు రాబోతున్న ‘చల్ మోహన్ రంగ’ విషయంలో మంచి డీల్ జరిగినట్లు సమాచారం. ఈ చిత్ర శాటిలైట్.. డిజిటల్ హక్కుల్ని జీ తెలుగు ఛానెల్ రూ.5 కోట్లకు కొన్నట్లు సమాచారం.

‘చల్ మోహన్ రంగ’ రేంజికి ఇది మంచి డీలే. ఈ సినిమాపై పాజిటివ్ బజ్ ఉండటం.. స్యూర్ షాట్ హిట్ అనే ఫీలింగ్ ఇండస్ట్రీలో ఉండటంతో జీ తెలుగు వాళ్లు విడుదలకు ముందే డీల్ సెట్ చేసేశారట. ఈ చిత్రంపై ముందు నుంచి పాజిటివ్ బజ్ ఉంది. పవన్ కళ్యాణ్-త్రివిక్రమ్-నితిన్ కాంబినేషన్ జనాల్లో ఆసక్తి రేకెత్తించింది. ‘రౌడీఫెలో’ లాంటి విభిన్నమైన సినిమాతో దర్శకుడిగా సత్తా చాటుకున్న కృష్ణచైతన్య ఈ చిత్రానికి దర్శకత్వం వహించడం కూడా కలిసొచ్చింది. ఈ చిత్ర ప్రోమోలు కూడా ఆకట్టుకున్నాయి. ఈ నేపథ్యంలోనే శాటిలైట్ రేటు బాగానే వచ్చినట్లు తెలుస్తోంది. నితిన్ తండ్రి సుధాకర్ రెడ్డి నిర్మించిన ఈ చిత్రానికి పవన్ కళ్యాణ్.. త్రివిక్రమ్ సమర్పకులుగా వ్యవహరిస్తున్నారు. మేఘా ఆకాష్ కథానాయికగా నటించగా.. తమన్ సంగీతాన్నందించాడు.