తేజు చూపిస్తున్న చిరు చమక్కులు

మెగా ఫ్యామిలీ హీరోగా సాయి ధరం తేజ్ ఇప్పటికే స్ట్రాంగ్ మార్కెట్ ను క్రియేట్ చేసుకున్నాడు. అయితే.. గతేడాది ఈ హీరో సినిమాలకు ఓపెనింగ్స్ వచ్చాయి తప్ప.. సక్సెస్ చిక్కలేదు. వరుస హిట్స్ నుంచి కొంచెం డీలా పడ్డ తేజు.. ఈ సారి మాస్ డైరెక్టర్ వివి వినాయక్ తో కలిసి.. పక్కా మాస్ సినిమా ఇంటెలిజెంట్ ను రిలీజ్ కి రెడీ చేసేశాడు.

మెగాస్టార్ ను కానీ.. పవన్ కళ్యాణ్ ను కానీ ఇమిటేట్ చేయడంలో ఏ మాత్రం మొహమాటపడని సాయిధరం తేజ్.. ఇంటెలిజెంట్ సినిమా కోసం మరోసారి చిరంజీవి సూపర్ హిట్ సాంగ్ ను రీమేక్ చేసేశాడు. మెగా హిట్స్ మాంచి సాంగ్స్ ను ఎంచుకుని రీమిక్స్ లతో అలరిస్తున్న ఈ హీరో.. ఇప్పుడు కొండవీటి దొంగ మూవీ నుంచి 'చమకు చమకు చాం' అంటూ సాగే సూపర్బ్ సాంగ్ ను తన స్టైల్ లో రీమిక్స్ చేశాడు. మెగాస్టార్ - విజయశాంతి అప్పుడు ఈ పాటలో మెరిస్తే.. ఇప్పుడు ఆ పాటను తేజు- లావణ్య త్రిపాఠి రక్తి కట్టించినట్లుగా కనిపిస్తోంది.

చమక్ చమక్ చాం లిరికల్ సాంగ్ ను విడుదల చేయగా.. ఇప్పుడీ పాటకు అదిరిపోయే రెస్పాన్స్ వస్తోంది. అద్భుతమైన ఆ ట్యూన్ ను ఏ మాత్రం చెడగొట్టకుండా.. కంప్లీట్ గా అదే ట్యూన్ ను కొనసాగించగా.. మెగాస్టార్ స్టెప్స్ ను కూడా ట్రై చేసినట్లు.. లిరికల్ సాంగ్ లో చూపించిన ఫోటోలను చూస్తే అర్ధమవుతుంది. కంపోజ్ తమన్ రీమిక్స్ చేసిన తీరు కూడా బాగానే మెప్పించింది. మొత్తానికి హిట్టు కోసం సాయిధరం తేజ్ మరోసారి మెగాస్టార్ చమక్కులు చూపించేయనున్నాడు.