ఆ హీరో టీజర్ వచ్చింది గుర్తించారా?

దశాబ్దం కిందట వచ్చిన ‘సంభవామి యుగేయుగే’ సినిమాతో టాలీవుడ్లో అడుగుపెట్టాడు నవీన్ చంద్ర. ఐతే అది వచ్చిన ఏడేళ్లకు కానీ నవీన్ గురించి జనాలకు తెలియలేదు. 2012లో వచ్చిన ‘అందాల రాక్షసి’ అతడికి మంచి పేరు తెచ్చిపెట్టింది. ఆ తర్వాత దళం.. నా రాకుమారుడు.. భమ్ బోలేనాథ్.. త్రిపుర.. లచ్చిందేవికి ఓ లెక్కుంది లాంటి సినిమాల్లో నటించాడు నవీన్. ఇప్పటిదాకా అతను కమర్షియల్ సక్సెస్ మాత్రం రుచి చూడలేదు. ఎన్నో ఆశలు పెట్టుకున్న ‘లచ్చిందేవికి ఓ లెక్కుంది’ అతణ్ని తీవ్రంగా నిరాశ పరిచింది. ఆ దెబ్బతో నవీన్ నటిస్తున్న కొత్త సినిమా మీద జనాలకు ఆసక్తి తగ్గిపోయింది.

నవీన్ చంద్ర ప్రస్తుతం ‘చందమామ రావే’ అనే సినిమాలో నటిస్తున్నాడు. ‘అది రాదు.. వీడు మారడు’ అనే ఆసక్తికరమైన శీర్షిక పెట్టారు. ధర్మ-రక్ష అనే ఇద్దరు యువ దర్శకులు కలిసి ఈ చిత్రాన్ని రూపొందిస్తుండటం విశేషం. ప్రియల్ గోర్ కథానాయికగా పరిచయమవుతోంది. ‘చందమామ రావే’ టీజర్ ఇటీవలే విడుదలైంది. ఇది ఓ కుర్రాడి బ్రేకప్ స్టోరీ. ‘‘ఆ దేవదాసును పార్వతి ఒక్కసారి మాత్రమే వదిలేసింది.. కానీ నా పారు మూడుసార్లు వదిలేసింది’’ అంటూ బాధ పడుతున్నాడు నవీన్ చంద్ర టీజర్లో. అలాగే తనకు నచ్చని అమ్మాయిని తప్పనిసరి పరిస్థితుల్లో లవ్ చేయాల్సి రావడంతో బాగా ఫ్రస్టేట్ అవుతున్నాడు కూడా. టీజర్ ఇంట్రెస్టింగానే అనిపిస్తోంది. విజువల్స్ కూడా రిచ్ గా కనిపిస్తున్నాయి. నవీన్ రెండు రకాల గెటప్పుల్లో దర్శనమిస్తున్నాడు. మరి టాలెంట్ ఉన్నా సక్సెస్ అందుకోలేకపోతున్న నవీన్.. ఈ సినిమాతో అయినా ట్రాక్ లో పడతాడేమో చూద్దాం.