ఇండస్ట్రీలో కనిపించకుండా చేస్తానని ఆ నిర్మాత భయపెట్టాడు: చాందిని చౌదరి

యూట్యూబ్ లో షార్ట్ ఫిలిమ్స్ తో పాపులారిటీ తెచ్చుకున్న వైజాగ్ బ్యూటీ చాందినీ చౌదరి.. ఆ తర్వాత రోజుల్లో వెండితెరపై సందడి చేసింది. ఎన్నో సినిమాల్లో సపోర్టింగ్ రోల్స్ లో మెరిసిన చాందిని.. 'కలర్ ఫోటో' చిత్రంతో హీరోయిన్ గా మంచి సక్సెస్ అందుకుంది. ఈ క్రమంలో 'బొంబాట్' 'సూపర్ ఓవర్' సినిమాలతో పాటుగా పలు వెబ్ సిరీస్ లతో అలరించింది.

అందం అభినయం కలబోసిన ఈ తెలుగమ్మాయి.. టాలీవుడ్ లో క్రేజీ హీరోయిన్ గా మారలేకపోయిందనే చెప్పాలి. గ్లామర్ ట్రీట్ కు దూరంగా ఉండటం.. బరువు తగ్గి మరీ బక్కచిక్కిపోయి ఉడటం ఆమెకు ప్రతికూలాంశాలుగా మారాయని కామెంట్స్ చేసేవారు కూడా ఉన్నారు.

లేటెస్టుగా కిరణ్ అబ్బవరం సరసన చాందిని చౌదరి హీరోయిన్ గా నటించిన 'సమ్మతమే' సినిమా రిలీజ్ కు రెడీ అయింది. ఇప్పటికే అన్ని కార్యక్రమాలు పూర్తి చేసుకున్న ఈ సినిమా.. ఈ నెల 24న థియేటర్లలోకి రాబోతోంది. ఈ నేపథ్యంలో ప్రమోషనల్ కార్యక్రమాల్లో పాల్గొంటోంది.

ఇందులో భాగంగా హాస్యనటుడు అలీ హోస్ట్ చేస్తున్న ఓ టాక్ షోకి హీరో కిరణ్ తో కలిసి హాజరైంది చాందిని. ఇండస్ట్రీలో తనకు ఎదురైన చేదు అనుభవాల గురించి చెప్పి ఆవేదన వ్యక్తం చేసింది. తనని, తన కుటుంబాన్ని ఇండస్ట్రీలో కనిపించకుండా చేస్తానని ఓ నిర్మాత బెదిరించిన విషయాన్ని బయటపెట్టింది.

'ఒక ప్రొడ్యూసర్ నీతో సినిమా తీయకుండా కావాలని నీ కెరీర్ కి బ్రేక్ వేశారని విన్నాను' అని ఆలీ అడగ్గా.. "కనిపించకుండా చేస్తానని చాలా భయపెట్టారు. నన్ను, మా ఫ్యామిలీని కూడా. తర్వాత నాకు తెలిసింది ఏంటంటే ఆయన సైన్ చేయించుకున్న కాంట్రాక్ట్ వ్యాలిడ్ కాదని" అని చాందిని చౌదరి చెప్పింది.

'నీకు అన్యాయం జరుగుతున్నప్పుడు ఇండస్ట్రీలో ఉన్న పెద్దల దగ్గరకు ఎందుకు వెళ్లలేదు?' అని ఆలీ అడగ్గా.. "ఎవరి దగ్గరకు వెళ్ళను? నన్ను నేను బ్యాకప్ చేసుకోవడానికి నాకు ఏముంది? చిటికెలో నన్ను మసి చేసేస్తారు కదా" అని చాందిని ఆవేదన వ్యక్తం చేసింది.

అలీ షో ప్రోమోలో పెద్దగా ఏమీ వెల్లడించనప్పటికీ.. చాందిని చౌదరి వంటి టాలెంటెడ్ బ్యూటీ కెరీర్ ను అణిచివేసేందుకు ఇండస్ట్రీలో ఒక పెద్ద నిర్మాత ప్రయత్నించినట్లు చెప్పడంతో అందరూ షాక్ అవుతున్నారు. ఇంకా ఆమె ఏం చెప్పిందో తెలియాలంటే ఫుల్ ఇంటర్వ్యూ ప్రసారమయ్యే వరకూ ఆగాల్సిందే.