‘చిన్నవాడా..’లో చందూ మొండేటి!

యువ కథానాయకుడు నిఖిల్.. యంగ్ డైనమిక్ డైరెక్టర్ చందూ మొండేటిల బంధం గురించి కొత్తగా చెప్పాల్సిన పని లేదు. వీళ్లిద్దరూ కలిసి సినిమా చేసింది రెండేళ్ల కిందటే కానీ.. వీళ్లిద్దరిదీ చాలా ఏళ్ల బంధం. నిఖిల్‌ కు సినిమాల్లో బ్రేక్ రావడానికి ముందు.. చందూ సహాయ దర్శకుడిగా ఉన్నప్పుటి నుంచి వీళ్లిద్దరికి పరిచయం ఉంది. ఇద్దరూ ఇండస్ట్రీలో స్ట్రగుల్ అయ్యారు. నిఖిల్ కెరీర్ ను మలుపు తిప్పిన ‘స్వామి రారా’కు చందూ సహాయ దర్శకుడు. ఆ తర్వాత అతను దర్శకుడిగా మారడంలోనూ నిఖిల్ కీలక పాత్ర పోషించాడు. ఎంతోమంది హీరోలు తిరస్కరించిన ‘కార్తికేయ’ స్క్రిప్టును అతను నమ్మాడు. సినిమా పట్టాలెక్కడానికి తన వంతు కృషి చేశాడు. ఈ కారణంతోనే నిఖిల్ తర్వాతి సినిమాలకూ తన వంతు తోడ్పాటు అందిస్తూ వస్తున్నాడు చందూ.

‘సూర్య వెర్సస్ సూర్య’ సినిమాకు మాటలు చందూనే రాశాడన్న సంగతి తెలిసిందే. నిఖిల్ లేటెస్ట్ మూవీ ‘ఎక్కడికి పోతావు చిన్నవాడా’లో కూడా చందూ హ్యాండ్ ఉన్నట్లు సమాచారం. టైటిల్స్ లో అతడి పేరు పడలేదు కానీ.. కొన్ని సన్నివేశాలకు పెన్ సాయం చేశాడట చందూ. ప్రథమార్ధంలో వచ్చే కామెడీ సీన్స్ కొన్ని చందూనే రాశాడట. అవి సినిమాలో బాగానే పేలాయి. ఎక్కడికి పోతావు చిన్నవాడా’ స్క్రిప్టు విని.. నిఖిల్ కు అది బాగుంటుందని కూడా ఫీడ్ బ్యాక్ ఇచ్చాడట చందూ. తన ప్రతి సినిమా కథనూ ఓసారి చందూకు వినిపించే అలవాటూ నిఖిల్ కు ఉంది. ఆ రకంగా మిత్రుడికి బాగానే సాయం చేస్తున్నాడటన్న మాట చందూ. ‘కార్తికేయ’ తర్వాత వీళ్లిద్దరి కాంబినేషన్లో మరో సినిమా వచ్చే ఏడాది ఆరంభమయ్యే అవకాశం కూడా ఉంది. అది ‘కార్తికేయ’ సీక్వెల్ కావచ్చని సమాచారం.

Like Us on Facebook : https://www.facebook.com/Tupakidotcom/