'ప్రేమమ్' దర్శకుడితో నివేథా కామెడీ థ్రిల్లర్...!

టాలెంటెడ్ హీరోయిన్ నివేథా పేతురాజ్.. శ్రీవిష్ణు హీరోగా నటించిన 'మెంటల్ మదిలో' సినిమాతో తెలుగు తెరకు పరిచయమైంది. ఆ తర్వాత సాయి ధరమ్ తేజ్ నటించిన 'చిత్ర లహరి' సినిమాతో మంచి గుర్తింపు తెచ్చుకుంది. ఇక 'బ్రోచేవారేవరురా..' సినిమాతో తెలుగు ప్రేక్షకులకు బాగా దగ్గరైపోయింది. ఈ ఏడాది ప్రారంభంలో 'అల వైకుంఠపురములో' సినిమాలో కనిపించింది కొద్ది సేపు అయినా ప్రేక్షకులను కనువిందు చేసింది. తెలుగులో కథాబలం ఉన్న చిత్రాల్లో నటిస్తూ వస్తున్న నివేథా.. ప్రస్తుతం రామ్ హీరోగా వస్తోన్న 'రెడ్' సినిమాలో నటిస్తోంది. ఈ క్రమంలో తాజాగా తెలుగులో ఓ కామెడీ థ్రిల్లర్ షూటింగ్ స్టార్ట్ చేసింది.

'కార్తికేయ' 'ప్రేమమ్' 'సవ్యసాచి' వంటి చిత్రాలను అందించిన టాలెంటెడ్ డైరెక్టర్ చందు మొండేటి దర్శకత్వంలో ఈ సినిమా తెరకెక్కుతోంది. పీపుల్ మీడియా ఫ్యాక్టరీ బ్యానర్ పై టీజీ విశ్వప్రసాద్ - వివేక్ కూచిభోట్ల‌ ఈ చిత్రాన్ని నిర్మిస్తున్నారు. నివేథా పేతురాజ్ తన కెరీర్లో మొదటిసారిగా లేడీ ఓరియెంటెడ్ సినిమాలో నటిస్తుందని చెప్పవచ్చు. ఈ సినిమా షూటింగ్ నేడు హైదరాబాద్ లోని ఆర్ ఎఫ్ సి లో పూజా కార్యక్రమాలతో ప్రారంభమైంది. శరవేగంగా షూటింగ్ జరిపి సింగిల్ షెడ్యూల్ లో ఈ చిత్రాన్ని కంప్లీట్ చేస్తారని తెలుస్తోంది. ఈ సినిమాలో నటించే నటీనటులి సాంకేతిక నిపుణుల వివరాలు త్వరలోనే వెల్లడికానున్నాయి.

వాస్తవానికి చందు మొండేటి పీపుల్ మీడియా ఫ్యాక్టరీ బ్యానర్ లో 'కార్తికేయ 2' చిత్రాన్ని చేయాల్సి ఉంది. 'సవ్యసాచి' సినిమా తరువాత దాదాపు రెండేళ్లు గ్యాప్ తీసుకున్న చందు మొండేటి 'కార్తికేయ 2' స్క్రిప్ట్ రెడీ చేసుకున్నాడు. అయితే కరోనా వచ్చి ఈ చిత్రానికి బ్రేక్స్ వేసింది. అందులోనూ ఈ సినిమా హై బడ్జెట్ మూవీ కావడం.. కొంత భాగం ఫారిన్ లో చిత్రీకరించాల్సి ఉండటంతో ప్రస్తుతానికి ఈ చిత్రాన్ని హోల్డ్ లో పెట్టారని తెలుస్తోంది. అందుకే ఈ గ్యాప్ లో అదే బ్యానర్ లో చందు మొండేటి ఈ కామెడీ థ్రిల్లర్ స్టార్ట్ చేసాడని సమాచారం. ఈ సినిమా షూటింగ్ పూర్తై.. కరోనా పరిస్థితులు కంట్రోల్ లోకి వచ్చిన వెంటనే 'కార్తికేయ 2' చిత్రాన్ని ప్రారంభిస్తారని సమాచారం.