ఎన్టీఆర్ ఆడియో లాంచ్..బాబు ఎందుకు రావడం లేదు?

ఎన్టీఆర్ బయోపిక్ విషయంలో టీడీపీ అధినేత చంద్రబాబు చాలా జాగ్రత్తలు తీసుకుంటున్నారట. ఈ సినిమాకు సంబంధించిన కార్యక్రమాల్లో ప్రస్తుతం ఎక్కడా కనిపించకపోవడమే బెస్టని అనుకుంటున్నారట. అందులో భాగంగానే ఆయన శుక్రవారం ఈ సినిమా ఆడియో లాంచ్ కార్యక్రమంలో పాల్గొనడం లేదని తెలుస్తోంది.

బాలకృష్ణ ప్రధానపాత్రలో నటిస్తుండడంతో పాటు ఎంతోమంది స్టార్లు నటిస్తున్న ఈ సినిమా ఆడియో లాంచ్ శుక్రవారం జేఆర్సీ కన్వెన్షన్లో ఉంది. ఈ సినిమాలో ఎన్టీఆర్ పాత్రను బాలయ్య పోషిస్తుండగా.. చంద్రబాబు పాత్రను దగ్గుబాటి రాణా పోషిస్తున్నారు. ఈ క్రమంలో ఆడియో లాంచ్ కార్యక్రమానికి చంద్రబాబు హాజరవుతారని అంతా భావించారు. కానీ, చంద్రబాబు శుక్రవారం నాటి ఈ కార్యక్రమానికి రావడం లేదట.

ఆయన ఈ సినీ కార్యక్రమానికి రాకపోవడం వెనుక రాజకీయ కారణాలున్నాయని సమాచారం. ఎన్టీఆర్ జీవితంలో చంద్రబాబు పాత్ర... ఎన్టీఆర్ స్థాపించిన పార్టీ ఇప్పుడు చంద్రబాబు చేతిలో ఉండడం.. కానీ, ఈ సినిమాలో అవేమీ ఉండే అవకాశాలు లేకపోవడంతో ఇప్పుడే ఈ సినిమాకు సంబంధించిన కార్యక్రమాల్లో పాల్గొంటే రాజకీయంగా అనవసర చర్చలకు తావిచ్చినట్లవుతుందన్న ఉద్దేశంతో చంద్రబాబు ఈ కార్యక్రమం నుంచి దూరంగా ఉంటున్నట్లు సమాచారం.