ఆ ఒక్కటీ వస్తే చరణ్ బర్త్ డే మరింత స్పెషల్ గా ఉండేది..!

మెగా వారసుడిగా మెగా పవర్ స్టార్ గా అభిమానులను అలరిస్తున్న రామ్ చరణ్ నేడు 36వ పుట్టినరోజును జరుపుకుంటున్నారు. ఈ నేపథ్యంలో సినీ ప్రముఖులు సోషల్ మీడియా వేదికగా చెర్రీ కి బర్త్ డే విషెస్ తెలియజేస్తున్నారు. కామన్ డీపీ - మోషన్ పోస్టర్ అంటూ హడావిడి చేసిన మెగా ఫ్యాన్స్ పెద్ద ఎత్తున సంబరాలు జరుపుతున్నారు. వారి ఆనందాన్ని రెట్టింపు చేయడానికి చరణ్ ప్రస్తుతం నటిస్తున్న 'ఆర్.ఆర్.ఆర్' మరియు 'ఆచార్య' సినిమాల అప్డేట్స్ వచ్చాయి.

విజయదశమి సందర్భంగా అక్టోబర్ 13న విడుదల కానున్న 'ఆర్.ఆర్.ఆర్' చిత్రం నుంచి చరణ్ పుట్టినరోజు కానుకగా అల్లూరి సీతారామరాజు లుక్ ని రిలీజ్ చేశారు. అగ్గిపిడుగు మన్నెం దొర అల్లూరిగా మెగా పవర్ స్టార్ లుక్ అందరినీ ఆకట్టుకుంది. ఇదే క్రమంలో తన తండ్రి మెగాస్టార్ చిరంజీవితో కలిసి నటిస్తున్న 'ఆచార్య' నుంచి కూడా కొత్త పోస్టర్ వదిలారు. ధర్మానికి ధైర్యం తోడైన వేళ అంటూ ఆచార్యతో కలిసి వస్తున్న సిద్ధ లుక్‌ ని రిలీజ్‌ చేశారు. తండ్రీకొడుకులను ఒకే ఫ్రేమ్ లో చూసిన మెగా అభిమానులకి ట్రీట్ లాగా అనిపించింది. అయితే 'RC15' నుంచి కూడా ఏదొక అప్డేట్ వచ్చి ఉంటే చరణ్ బర్త్ డే మరింత స్పెషల్ గా ఉండేదని ఫ్యాన్స్ అంటున్నారు.

క్రియేటివ్ జీనియస్ శంకర్ దర్శకత్వంలో రామ్ చరణ్ ఓ పాన్ ఇండియా సినిమా చేయనున్న విషయం తెలిసిందే. ఈ చిత్రాన్ని శ్రీ వెంకటేశ్వర క్రియేషన్స్ బ్యానర్ పై దిల్ రాజు - శిరీష్ నిర్మించనున్నారు. అయితే ఈరోజు పాత ఫోటోతో మేకర్స్ చరణ్ కు బర్త్ డే విషెస్ చెప్పడం ఫ్యాన్స్ ను డిజప్పాయింట్ చేసింది. ఈ సినిమాకు సంబంధించిన కొత్త అప్డేట్ లేదా న్యూ పోస్టర్ వస్తుందని వారు భావించారు. అయితే ప్రస్తుతం ప్రీ ప్రొడక్షన్ ప్రారంభ దశలో ఉన్న సినిమా నుంచి అప్డేట్ ఎక్సపెక్ట్ ఆశించడం కూడా కరెక్ట్ కాదని చెప్పవచ్చు. ప్రస్తుతం 'ఆర్.ఆర్.ఆర్' మరియు 'ఆచార్య' సినిమాలతో బిజీగా ఉన్న చరణ్.. 'RC15' చిత్రాన్ని ఈ ఏడాదే స్టార్ట్ చేయనున్నాడు.