ఎన్టీఆర్ - యష్ కంటే చరణ్ కాస్త ముందున్నాడు..!

ఏ హీరో అయినా సక్సెస్ వచ్చిన వెంటనే దాన్ని కంటిన్యూ చేసేలా మార్కెట్ ని విస్తరించుకునేలా పర్ఫెక్ట్ ప్లాన్ తో ముందుకు వెళ్లాలని అనుకుంటాడు. అదే పాన్ ఇండియా స్థాయిలో ఇమేజ్ వస్తే.. దాన్ని కాపాడుకునే విధంగా ప్రాజెక్ట్స్ ని సెట్ చేసుకుంటారు. కానీ ఇప్పుడు నేషనల్ వైడ్ క్రేజ్ సంపాదించుకున్న ఇద్దరు సౌత్ స్టార్ హీరోలు ప్రస్తుతం ఖాళీగా ఉండటం అందరినీ ఆశ్చర్యానికి గురి చేస్తోంది. వారెవరో కాదు ఎన్టీఆర్ మరియు యష్.

టాలీవుడ్ యంగ్ టైగర్ ఎన్టీఆర్ మరియు శాండల్‌ వుడ్ రాకింగ్ స్టార్ యష్ ఇద్దరూ ఇప్పుడు యాదృచ్ఛికంగా ఒకే దారిలో ప్రయాణిస్తున్నారు. బిగ్గెస్ట్ బ్లాక్ బస్టర్స్ అందుకొని పాన్ ఇండియా స్టార్స్ గా మారినప్పటికీ.. ఇంతవరకూ తమ తదుపరి చిత్రాలను సెట్స్ మీదకు తీసుకెళ్లలేకపోయారు. నెలలు గడుస్తున్నా వారి నెక్స్ట్ ప్రాజెక్ట్స్ ఇంకా ప్రీ ప్రొడక్షన్ దశలోనే ఉండటం గమనార్హం. తారక్ విషయంలో ఓదార్పు ఏమిటంటే.. అతని సినిమా ఇప్పటికే ప్రకటించబడింది.

ఎస్ఎస్ రాజమౌళి దర్శకత్వంలో తెరకెక్కిన RRR చిత్రంతో ఎన్టీఆర్ ఘన విజయాన్ని సాధించడమే కాదు.. అంతర్జాతీయంగా ప్రశంసలు అందుకున్నాడు. దీంతో అగ్ర హీరో నెక్స్ట్ మూవీ గురించి అందరూ ఆసక్తిగా ఎదురుచూస్తున్నారు. కొరటాల శివ దర్శకత్వంలో NTR30 సినిమా చేయనున్నట్లు అధికారిక ప్రకటన ఇచ్చారు. అయితే వివిధ కారణాల వల్ల, ఈ సినిమా ఆలస్యం అవుతూనే ఉంది.

ఈ నేపథ్యంలో NTR30 పై రోజుకో రూమర్ వస్తూనే ఉంది. అయితే ప్రస్తుతం ప్రీ ప్రొడక్షన్ కార్యక్రమాలు శరవేగంగా జరుగుతున్నాయని చిత్ర వర్గాలు తెలిపాయి. తారక్ - కొరటాల సినిమా త్వరలో సెట్స్‌ పైకి వెళ్లే అవకాశం ఉందని నివేదికలు ఉన్నాయి. కొత్త సంవత్సరంలో ప్రారంభిస్తారని కూడా వార్తలు వస్తున్నాయి. అయితే షూటింగ్ ఎప్పటి నుంచి మొదలవుతుందనే విషయం మీద ఇప్పటి వరకు క్లారిటీ లేదు.

మరోవైపు ప్రశాంత్ నీల్ దర్శకత్వంలో రూపొందిన KGF-2 సినిమాతో పాన్ ఇండియా బ్లాక్ బస్టర్ అందుకున్నాడు యష్. అయితే ఇంతవరకూ తన కొత్త సినిమా Yash19 గురించి ఏమీ ప్రకటించలేదు. 'ముఫ్తీ' ఫేమ్ నర్తన్ సినిమాతో సహా పలు ప్రాజెక్టులను పరిశీలిస్తున్నాడు కానీ.. ఇంకా ఏదీ ఖరారు కాలేదు. అతను KGF కు తగ్గట్లుగా ఎలాంటి సినిమాకి సంతకం చేయాలనే విషయంలో అయోమయంలో ఉన్నాడని.. చాలా జాగ్రత్తలు తీసుకుంటున్నాడని తెలుస్తోంది.

ఇటీవల 'జాన్ విక్ 2' వంటి పలు ఆంగ్ల చిత్రాలకు పని చేసిన హాలీవుడ్ స్టంట్ డైరెక్టర్ జె.జె. పెర్రీ పర్యవేక్షణలో యష్ గన్ షూటింగ్ ప్రాక్టీస్ చేస్తూ కనిపించాడు. #Yash19 సినిమాలో యాక్షన్ సీన్స్ కోసమే కన్నడ హీరో సాధన చేస్తున్నారని అందరూ అనుకున్నారు. ఈ క్రమంలో సోషల్ మీడియాలో అనేక రూమర్స్ వచ్చాయి. దీపావళికి అనౌన్స్ మెంట్ వస్తుందని అన్నారు. కానీ జరగలేదు. అసలు దీనిపై ఎవరికీ క్లారిటీ లేదు.

ఇలా ఇద్దరు దక్షిణాది స్టార్ హీరోలు ప్రస్తుతం షూటింగ్స్ లేకుండా ఖాళీగానే ఉంటున్నారు. దీంతో వారి అభిమానులు నిరాశ చెందడమే కాదు.. నిరుత్సాహానికి గురవుతున్నారు. కానీ ఈ విషయంలో ఎన్టీఆర్ - యష్ ల కంటే మెగా పవర్ స్టార్ రామ్ చరణ్ ముందున్నాడని చెప్పాలి. RRR చిత్రంతో పాన్ ఇండియా క్రేజ్ వచ్చిన తర్వాత షో మ్యాన్ శంకర్ దర్శకత్వంలో RC15 వంటి భారీ సినిమా చేస్తున్నారు.

నిజానికి జక్కన్న సినిమా చివరి దశలో ఉన్నప్పుడే చరణ్ తన నెక్స్ట్ ప్రాజెక్ట్ ని సెట్ చేసుకున్నారు. దానికి తగ్గట్టుగానే వెంటనే సెట్స్ మీదకు తీసుకెళ్లారు. ట్రిపుల్ ఆర్ తర్వాత సరైన దర్శకుడితో క్రేజీ ప్రాజెక్ట్ ని పట్టాలెక్కించాడు. అదే సమయంలో తారక్ - యష్ మాత్రం తదుపరి సినిమాలను ఇప్పటి వరకూ సెట్స్ మీదకు తీసుకురాలేకపోయారు. మరి వీరిలో ముందుగా ఎవరి సినిమా స్టార్ట్ అవుతుందో చూడాలి.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.