గాడ్ ఫాదర్ రాక కోసం మిస్టర్ బీన్‌ లా వేచి చేస్తున్న చరణ్..!

మెగాస్టార్ చిరంజీవి - మెగా పవర్ స్టార్ రామ్ చరణ్ కలిసి నటించిన 'ఆచార్య' సినిమా ఘోర పరాజయం చవిచూసింది. ప్లాప్ అవ్వడమే కాదు.. సోషల్ మీడియాలో విపరీతమైన ట్రోల్స్ ఎదుర్కొంది. దీన్ని వీలైనంత త్వరగా మర్చిపోవాలని భావిస్తున్న మెగా ఫ్యాన్స్.. మెగా తండ్రీకొడుకులు వెంటనే ఆ బాకీ తీర్చేయాలని కోరుకుంటున్నారు.

చిరంజీవి నటిస్తోన్న లేటెస్ట్ మూవీ ''గాడ్ ఫాదర్''. ఇది మలయాళంలో ఘన విజయం సాధించిన 'లూసిఫర్’ చిత్రానికి అధికారిక తెలుగు రీమేక్. మోహన్ రాజా దర్శకత్వంలో పొలిటికల్ యాక్షన్ థ్రిల్లర్ గా తెరకెక్కుతోంది. షూటింగ్ చివరి దశకు చేరుకున్న ఈ చిత్రంలో మెగాస్టార్ ఎలా కనిపిస్తారో అని అభిమానులు ఆసక్తిగా ఎదురుచూస్తున్నారు. ఈ నేపథ్యంలో ఫస్ట్ లుక్ అప్డేట్ ఇచ్చారు మేకర్స్.

జూలై 4న సాయంత్రం 5:45 గంటలకు చిరంజీవి 'గాడ్ ఫాదర్' ఫస్ట్ లుక్ ని రిలీజ్ చేయబోతున్నట్లు ప్రకటించారు. అయితే మెగా ఫ్యాన్స్ మాదిరిగానే ఈ సినిమా నిర్మాణంలో భాగం పంచుకున్న రామ్ చరణ్ కూడా ఈ ఫస్ట్ లుక్ కోసం ఎంతో ఆతృతగా వేచి చూస్తున్నారు. ఈ విషయాన్ని ఓ ఫన్నీ గిఫ్ ద్వారా తెలియజేసారు చెర్రీ.

జూలై 4వ తేదీ కోసం ఈ విధంగా వెయిట్ చేస్తున్నానంటూ.. పాపులర్ మిస్టర్ బీన్‌ కి సంబంధించిన ఓ Gif ను ట్విట్టర్ లో షేర్ చేశారు రామ్ చరణ్. అందులో మిస్టర్ బీన్ టైమ్ చూసుకుంటూ దేని కోసమే వేచి చేస్తున్నట్లు ప్రవర్తిస్తుంటాడు.

ఇకపోతే మెగాస్టార్ ను ఆయన అభిమానులు ఎలాంటి అవతార్‌ లో చూడాలనుకుంటున్నారో 'గాడ్ ఫాదర్' లో అలాంటి మాస్ అండ్ స్టైలిష్ లుక్ లో కనిపిస్తారని తెలుస్తోంది. మోహన్ రాజా ఈ చిత్రానికి దర్శకత్వం వహిస్తున్నారు.

ఇందులో బాలీవుడ్ స్టార్ సల్మాన్ ఖాన్ కీలక పాత్ర పోషిస్తున్నారు. నయనతార - సత్యదేవ్ ఇతర ప్రధాన పాత్రల్లో నటిస్తుండగా.. డైరెక్టర్ పూరీ జగన్నాథ్ గెస్ట్ రోల్ లో కనిపించనున్నారు.

సురేఖ సమర్పణలో కొణిదెల ప్రొడక్షన్ కంపెనీ మరియు సూపర్ గుడ్ ఫిలింస్ పతకాలపై ఆర్‌బి చౌదరి - ఎన్‌వి ప్రసాద్‌ ఈ చిత్రాన్ని భారీ ఎత్తున నిర్మిస్తున్నారు. ఎస్ఎస్ థమన్ సంగీతం సమకూరుస్తున్నారు. నీరవ్ షా సినిమాటోగ్రఫీ అందిస్తుండగా.. సురేష్ సెల్వరాజన్ ఆర్ట్ డైరెక్టర్ గా వర్క్ చేస్తున్నారు.