నేపాల్ పేపర్ ఫస్టు పేజీలో చరణ్ పోస్టర్!

మన హీరోలను గురించి మనకంటే పక్క రాష్ట్రాలవారు చెప్పుకుంటే ఆనందంగా ఉంటుంది .. పక్క దేశాలవారు చెప్పుకుంటే మరింత ఆనందంగా ఉంటుంది. ఇప్పుడు చరణ్ విషయంలో అదే జరుగుతోంది. నేపాల్ లో చరణ్ క్రేజ్ అమాంతంగా పెరిగిపోతోంది.

'ఆర్ ఆర్ ఆర్' సినిమాలో చరణ్ కి సంబంధించిన అల్లూరి సీతారామరాజు పోస్టర్ .. నేపాల్ లోని ఒక పేపర్లో ఫస్టు పేజీలో వచ్చింది. ఆ సినిమాలో చరణ్ నటనను ప్రశంసిస్తూ ఆ పేపర్లో రాసి ఉంటారని మెగా అభిమానులు సంతోష పడిపోతున్నారు .. సంబరపడిపోతున్నారు. నేపాల్ పేపర్లో వచ్చిన చరణ్ ఫొటో సోషల్ మీడియాలో ఇప్పుడు వైరల్ అవుతోంది.


మెగాస్టార్ వారసుడిగా చరణ్ ఎంట్రీ ఇచ్చినప్పటికీ, ఆ తరువాత తనకి తానుగా ఎదుగుతూ వచ్చాడు. డాన్సులు .. ఫైట్లు .. డైలాగ్ డెలివరీ .. ఇలా ఏ అంశానికి సంబంధించిన విషయంలోనైనా తనపై తండ్రి ప్రభావం పడకుండా .. తండ్రి స్టైల్ ను అనుకరించకుండా తనకంటూ ఒక స్టైల్ ను ఆయన సెట్ చేసుకున్నాడు. మెగాస్టార్ వారసుడిగా కాకుండా ఇప్పుడున్న యంగ్ స్టార్ హీరోల్లో ఒకరుగా కొనసాగుతున్నాడు. అలాంటి చరణ్ 'ఆర్ ఆర్ ఆర్' సినిమాతో పాన్ ఇండియా స్టార్ గా మారిపోయాడు. ఈ సినిమాలో అల్లూరి సీతారామరాజు లుక్ తో ఆయన అదరగొట్టేశాడు.


రాజమౌళి దర్శకత్వం వహించిన ఈ సినిమా ఎన్టీఆర్ తో పాటు చరణ్ కి కూడా మంచి పేరు తెచ్చిపెట్టింది. డాన్సులతో చరణ్ నెక్స్ట్ లెవెల్ కి వెళ్లిపోయాడనే విషయాన్ని ఈ సినిమా నిరూపించింది. యాక్టింగ్ పరంగా కూడా చరణ్ పై మెట్టుకు చేరుకున్నాడనే విషయం స్పష్టంగా తెలుస్తుంది.

ఆ తరువాత ప్రాజెక్టుగా ఆయన శంకర్ సినిమా చేస్తున్నాడు. కెరియర్ పరంగా చరణ్ కి ఇది 15వ సినిమా. ఇప్పటికే ఈ సినిమా నాలుగు షెడ్యూల్స్ ను పూర్తిచేసుకుంది. ఈ సినిమాలో చరణ్ సరసన నాయికగా కియారా అద్వాని ఆకట్టుకోనుంది.

ఇక ఈ సినిమా తరువాత ఆయన గౌతమ్ తిన్ననూరి దర్శకత్వంలో ఒక సినిమా చేయనున్నాడు. ప్రస్తుతం అందుకు సంబంధించిన సన్నాహాలు జరుగుతున్నాయి. ఇది ఎమోషన్స్ తో కూడిన యాక్షన్ డ్రామా అని అంటున్నారు. త్వరలోనే ఈ సినిమా పట్టాలెక్కనుంది. 'జెర్సీ' సినిమాతో నానీకి మంచి హిట్ ఇచ్చిన గౌతమ్ తిన్ననూరి, ఈ సినిమాలో చరణ్ ను కొత్తగా చూపించనున్నాడని చెబుతున్నారు. ఈ సినిమాలో కథానాయికగా రష్మిక పేరు వినిపిస్తోంది. మిగతా వివరాలు త్వరలోనే తెలిసే అవకాశం ఉంది.