పాప టైమింగ్ భలేగా ఉందే

పంజాబ్ నుంచి హైదరాబాద్ వచ్చి తెలుగు సినిమాలు చేస్తూ ఇక్కడ నేటివిటీకి అలవాటు పడిపోయిన సుందరాంగి ఛార్మి కౌర్. తెలుగు చక్కగా నేర్చుకుని మాట్లాడటంతో పాటు టాలీవుడ్ చందమామ కాజల్ కు డబ్బింగ్ కూడా చెప్పింది. కొంతకాలం తెలుగులో ఓ వెలుగు వెలిగింది. మంచి నటి అని పేరు తెచ్చుకుందే కానీ స్టార్ హీరోయిన్ గా ఎక్కువ రోజులు కొనసాగలేకపోయింది. ప్రస్తుతం సినిమా ఛాన్సులు తగ్గడంతో డైరెక్టర్ పూరి జగన్నాథ్ టీంలో చేరిపోయి ప్రొడక్షన్ పనులు చూసుకోవడం మొదలెట్టింది.

తాజాగా పూరి జగన్నాథ్ డైరెక్షన్ లో రూపొందిన పైసా వసూల్ ప్రొడక్షన్ టీం లో కూడా ఛార్మీ ఉంది. ఈ సినిమా షూటింగ్ అవుతుండగానే టాలీవుడ్ ను కదిలించిన డ్రగ్స్ కుంభకోణంలో ఛార్మీని సైతం విచారణకు పోలీసులు పిలిచారు. ఆ విచారణను.. తర్వాత సినిమా షూటింగ్ ను సక్సెస్ ఫుల్ గానే కంప్లీట్ చేసింది. మూవీ రిలీజ్ సందర్భంగా కొత్తగా రిలీజైన రూ. 200 నోట్లతో ఫోజులిస్తూ పైసావసూల్ బిగిన్స్ అంటూ కామెంట్ పెట్టింది. కొత్త నోట్ల రిలీజ్ కు.. కొత్త సినిమా రిలీజ్ కు లింక్ పెడుతూ ఛార్మీ పెట్టిన ఈ పోస్ట్ అభిమానులను బాగానే ఆకట్టుకుంటోంది. ఇక్కడి నుంచి వసూళ్లు లెక్క పెట్టుకోవడమే అంటూ కొందరు రిప్లయిలిచ్చారులే.. కాని వాళ్ళకు అప్పుడు సినిమా టాక్ తెలియదుగా!!

ఛార్మీ హీరోయిన్ గా నటించే రోజుల్లో బాలకృష్ణ పక్కన అల్లరి పిడుగు అనే సినిమా చేసింది. ఇందులో బాలీవుడ్ సుందరి కత్రినా మెయిన్ హీరోయిన్ కాగా.. ఛార్మీ సెకండ్ హీరోయిన్ గా నటించింది. మళ్లీ సుదీర్ఘ కాలం తర్వాత బాలకృష్ణ సినిమా కోసం పని చేసింది. కాకుంటే ఈసారి తెర వెనుక వర్క్ కే పరిమితమైంది.