చే-సామ్ సినిమా స్టార్ట్ అయ్యిందోచ్!

నాగ చైతన్య-సమంతాలు గతంలో 'ఏ మాయ చేసావే' లాంటి సూపర్ హిట్స్ లో నటించారు. కానీ తర్వాత నిజంగానే ప్రేమలో పడ్డారు. మళ్ళీ లేచి కాస్త తేరుకొని పెళ్లి చేసుకున్నారు. ఇప్పుడు మళ్ళీ భార్యా భర్తలుగా ఎవరి సినిమాలతో వాళ్ళు బిజీగా ఉన్నారు.. కానీ అభిమానులకు వాళ్ళని మళ్ళీ స్క్రీన్ పై జంటగా చూడాలని ఆశ. ఆ కోరికను దర్శకుడు శివ నిర్వాణ తీర్చడానికి సిద్ధమయ్యాడని ఇప్పటికే వార్తలు వచ్చాయి కదా. తాజా గా ఈ చిత్రాన్ని అధికారికంగా లాంచ్ చేశారు నిర్మాతలు.

అక్కినేని నాగార్జున ఈ కార్యక్రమానికి ముఖ్య అతిథిగా హాజరై బౌండు స్క్రిప్టును నిర్మాతల చేతికి అందించాడు. ఈ సినిమా టీమ్ కు బెస్ట్ విషెస్ తెలిపాడు. ఈ సినిమా రెగ్యులర్ షూటింగ్ ఆగష్టు నెల నుండి ప్రారంభం అవుతుందని సమాచారం. అప్పట్లోపు చైతు, సమంతాలు తాము ఇప్పటికే కమిట్ అయిన సినిమాల పెండింగ్ వర్క్ పూర్తి చేస్తారట. మరి ఈ సినిమా రెగ్యులర్ షూటింగ్ స్టార్ట్ అయితే ఎంచక్కా ఒకే ఆఫీసులో పనిచేసే ముచ్చటైన పడుచు జంటలా ఇద్దరూ ఒకేసారి ఇంటి నుండి బయలు దేరడం.. తిరిగి ఇంటికి రావడం చేస్తారేమో! ఎలాగూ చైతు డీసెంట్ జెంటిల్మన్ కాబట్టి 'పెద్దగా' ఇబ్బందులు ఉండవు.

పెళ్లి తర్వాత కలిసి నటించే మొదటి సినిమా కాబట్టి ఈ సినిమా టాలీవుడ్ లో మరో క్రేజీ ప్రాజెక్ట్ అవుతుందని చెప్పడంలో ఏమాత్రం సందేహం లేదు. ఈ చిత్రానికి గోపి సుందర్ సంగీతం అందిస్తున్నాడు. సాహు గారపాటి, హరీష్ పెద్ది ఈ సినిమాను షైన్ స్క్రీన్స్ బ్యానర్ పై నిర్మిస్తున్నారు.