హ‌మ్మ‌య్య‌.. చెర్రీకి ద‌ర్శ‌కుడు దొరికాడు.. ఏప్రిల్ లోనే సినిమా షురూ!

''రామ్ చ‌ర‌ణ్ నెక్స్ట్ సినిమా ఏంటీ..? చెర్రీని డైరెక్ట్ చేయబోయేది ఎవరు?'' ఎంతో కాలంగా స‌మాధానం లేని ఈ ప్ర‌శ్న‌ల‌కు, ఎట్టకేలకు ఆన్స‌ర్ దొరికింది. ఎంతో మంది ద‌ర్శ‌కులు లైన్లోకి వ‌చ్చి వెళ్ల‌గా.. ఎన్నో స్టోరీస్ విని వ‌దిలేయ‌గా.. చివ‌ర‌కు యంగ్ డైరెక్ట‌ర్ తో సినిమా చేసేందుకు ప‌చ్చ జెండా ఊపేశాడ‌ట చెర్రీ!

'మళ్లీ రావా' చిత్రంతో తెలుగు ఇండ‌స్ట్రీకి ప‌రిచ‌య‌మైన యువ ద‌ర్శ‌కుడు గౌత‌మ్ తిన్న‌నూరి.. తొలి సినిమాతో పెద్ద‌గా ఆక‌ట్టుకోలేక‌పోయాడు. అయినప్పటికీ.. డిజ‌ప్పాయింట్ కాకుండా.. నాచుర‌ల్ స్టార్ నానీతో జ‌ట్టుక‌ట్టాడీ ద‌ర్శ‌కుడు. ఇద్ద‌రూ క‌లిసి అద్భుత‌మైన ఇన్నింగ్స్ ఆడి.. త‌మ సినిమాకు అద్భుత‌మైన విజ‌యాన్ని అందించారు.

వీరిద్దరి కాంబోలో వచ్చిన 'జెర్సీ' సూపర్ హిట్ గా నిలిచింది. క్లాసికల్ మూవీగా పేరు తెచ్చుకున్న ఈ చిత్రం.. విమర్శకుల ప్రశంసలు అందుకుంది. ఈ సినిమాతో తన డెప్త్ ఎంతో చాటి చెప్పాడు దర్శకుడు గౌతమ్. మనోడి టేకింగ్ కు ఫిదా అయిన బాలీవుడ్ హీరో షాహిద్ కపూర్.. ఈ సినిమాను రీమేక్ చేయడమే కాకుండా తననే దర్శకుడిగా తీసుకున్నాడు.

ఇక, లేటెస్ట్ అప్డేట్ ఏమంటే.. ఒకేసారి టాలీవుడ్ టాప్ ఫ్లోర్ ఎక్కేసిన గౌతమ్, మెగాపవర్ స్టార్ రామ్ చరణ్ ను డైరెక్ట్ చేయబోతున్నాడు. చెర్రీ నెక్స్ట్ మూవీకి దర్శకుడిగా గౌతమ్ ఫిక్స్ అయ్యాడని సమాచారం. చాలా కథలు విన్న రామ్ చరణ్.. జెర్సీ దర్శకుడి కథకు 'బౌల్డ్' అయ్యాడని తెలుస్తోంది.

రామ్ చరణ్.. 'ఆర్ఆర్ఆర్'తో పాన్ ఇండియా స్టార్ గా మారబోతున్నాడు. దీంతో.. తన నెక్స్ట్ మూవీ కూడా అదే స్థాయిలో ఉండాలని భావిస్తున్నాడట. రాబోయే సినిమా రామ్ చరణ్ కు 15వ చిత్రం అవుతుంది. ఈ చిత్రాన్ని ఎన్‌వి ప్రసాద్ నిర్మించనున్నట్టు సమాచారం. అన్నీ సజావుగా సాగితే.. రాబోయే ఏప్రిల్‌లో ఈ మూవీ సెట్స్ పైకి వెళ్తుందని తెలుస్తోంది.