చేతన్ భగత్ కు ఊహించని అనుభవం..వైరల్ వీడియో..

నకిలీల గురించి కొత్తగా చెప్పాల్సిన అవసరమే లేదు. అడుగుకో నకిలీ కనిపిస్తుంది. అయితే.. తాను రాసిన పుస్తకం డూప్లికేట్ బుక్ కొనాల్సిన పరిస్థితి ఒక రచయతకు వస్తే? అంతకు మించిన ఇబ్బందికర పరిస్థితి మరొకటి ఉండదు. తాజాగా అలాంటి అనుభవాన్నే ఎదుర్కొన్నారు ప్రముఖ రచయిత చేతన్ భగత్. దేశంలో చాలామంది రచయితలు ఉన్నప్పటికీ.. చేతన్ భగత్ కు ఉన్న క్రేజ్ మాత్రం భిన్నం. యూత్ లో ఆయనకున్న ఇమేజ్ మిగిలిన వారితో పోలిస్తే చాలా భిన్నమైనది.

అలాంటి ఆయన తాజాగా కారులో వెళుతున్న వేళ.. పుస్తకాలు అమ్మే కుర్రాడు ఆయన వద్దకు వచ్చి పుస్తకాలు కొంటారా? అని అడిగాడు. చేతన్ భగత్ పుస్తకాలు ఉన్నాయా? అంటే.. ఉన్నాయంటూ పుస్తకాన్ని చూపించాడు. అది పైరసీ కాపీ కదా అంటే.. ఆన్ లైన్ అంటూ బదులిచ్చాడా కుర్రాడు. దీంతో కాస్త ఆశ్చర్యపోయినప్పటికీ.. ఆ పుస్తకం రాసింది తానేనంటూ.. బుక్ మీద ఉన్న తన ఫోటోను చూపించటంతో ఆ కుర్రాడు అవాక్కు అయ్యాడు. ఆ కుర్రాడి పేరును అడగ్గా సూరజ్ అని బదులిచ్చాడు.

అతని దగ్గర పుస్తకం కొన్నారు చేతన్ భగత్. తాను పైరసీని ప్రోత్సహించనని.. కాకుంటే ఇలాంటి పుస్తకాలతో సూరజ్ లాంటి యువకుల పొట్ట నిండుతుందని పేర్కొన్నారు. ఏమైనా పుస్తకం రాసిన రచయితకే పైరసీ పుస్తకాన్ని అమ్మేందుకు రావటం విశేషం. దీనికి సంబంధించిన వీడియో ఒకటి ఇప్పుడు వైరల్ అవుతోంది.

వీడియో కోసం క్లిక్ చేయండి