సంక్రాంతి క్యాన్సిల్‌, జ‌న‌వ‌రి చివ‌రిలో 150

మెగాస్టార్ చిరంజీవి హీరోగా వి.వి.వినాయ‌క్ ద‌ర్శ‌క‌త్వంలో 150వ సినిమా తెర‌కెక్క‌నున్న సంగ‌తి తెలిసిందే. ఈ సినిమా ఈ పాటికే ప్రారంభం కావాల్సింది. కార‌ణాంత‌రాల వ‌ల్ల ఆల‌స్యం అవుతూనే ఉంది. కార‌ణం ఏదైనా ఇది ఇంకా ఆల‌స్యం అయ్యే ఛాన్సుంద‌ని చెబుతున్నారు. జ‌న‌వ‌రి 1న కొత్త సంవ‌త్స‌రం కానుక‌గా ప్రారంభ‌మ‌వుతుంద‌ని ప్ర‌చార‌మైంది. ఫైన‌ల్‌ గా సంక్రాంతికి ఈ సినిమా ప్రారంభమవుతుందని భావించారు. కానీ ఇప్పుడు మరోసారి వాయిదా వేశారని తెలుస్తోంది.

మెగాస్టార్‌ చిరంజీవి స్క్రిప్టు విషయంలో ఏమాత్రం రాజీకి రావడం లేదు. వినాయక్‌ రచయితలతో కలిసి అవసరమైన మార్పు చేర్పులు చేస్తున్నారు. కత్తి ఒరిజినల్‌ తో పోలిస్తే తెలుగు వెర్షన్‌ లో కాస్తంత మార్పులు ఎక్కువే కనిపిస్తాయని మన స్థానికతకు తగ్గట్టే ఈ సినిమాలో మార్పులు ఉంటాయని చెప్పుకుంటున్నారు. కారణం ఏదైనా కత్తి రీమేక్‌ ని ఎంతో ప్రతిష్ఠాత్మకంగా తీసుకున్నారని దీన్ని బట్టి అర్థమవుతోంది. మరి ఈ సినిమా ప్రారంభోత్సవం ఎప్పుడు? అనేదానికి అట్నుంచి క్లారిటీ వచ్చింది. మెగాస్టార్‌ 150వ సినిమాని జనవరి ఎండింగులో ప్రారంభించేందుకు ఏర్పాట్లు చేస్తున్నారు.

ఇదే సినిమాతో రామ్‌ చరణ్‌ నిర్మాతగా ఆరంగేట్రం చేస్తున్నారు. రోబో -2 వంటి ప్రతిష్ఠాత్మక చిత్రాన్ని నిర్మిస్తున్నా లైకా ప్రొడక్షన్స్‌ తో కలిసి ఈ చిత్రాన్ని చరణ్‌ నిర్మిస్తున్నారని ఇటీవలి కాలంలో వార్తలొచ్చిన సంగతి తెలిసిందే. ఈ మూవీకి కథానాయికల్ని ఫైనల్‌ చేయాల్సి ఉందింకా.