నా సినిమాలు ఆ హీరోలు చేస్తే బాగుంటుంది - మెగాస్టార్

తెలుగు చిత్ర పరిశ్రమకు మకుఠం లేని మహారాజు చిరంజీవి. ఎవరి అండా లేకుండా ఇండస్ట్రీలో అడుగు పెట్టిన చిరు.. స్వయం కృషితో అంచెలంచెలుగా నెంబర్ వన్ స్థానానికి చేరుకున్నారు. మెగాస్టార్ బిరుదును సొంతం చేసుకొని కోట్లాది మంది ప్రేక్షకులను అలరిస్తున్నారు. అరవై వసంతాలు దాటినాా.. ‘ఈ దాహం తీరనిది’ అంటూ వరుసపెట్టి సినిమాలు చేస్తున్నారు ఈ ‘టాలీవుడ్ బిగ్ బాస్’.

అయితే.. ఆయన సినీ జర్నీలో ఎన్నో క్లాసిక్స్.. మరెన్నో ట్రెండ్ సెట్టర్స్.. బ్లాక్ బస్టర్స్ ఉన్నాయి. ఆయా సినిమాల్లో ఆయన పలికించిన హావభావాలు, డ్యాన్సులు ఆయనకు మాత్రమే సొంతం. అలాంటి సూపర్ హిట్స్ ను.. ఈ తరం హీరోలు చేయాల్సి వస్తే.. ఏ హీరోకు ఏ చిత్రం సెట్ అవుతుందన్నది ప్రశ్న. దీనికి ఎవరికి తోచిన ఆన్సర్ వాళ్లు ఇస్తారు. కానీ.. ఈ క్వశ్చన్స్ కు మెగాస్టారే సమాధానం చెప్తే ఎలా ఉంటుంది..?

సమంతా హోస్ట్ గా తెలుగు స్ట్రీమింగ్ యాప్ “ఆహా” లో రన్ అవుతున్న సెలబ్రిటీ టాక్ షో ‘సామ్ జామ్’. ఇటీవల ఈ షోకు విచ్చేశారు మెగాస్టార్. ఈ ఎపిసోడ్ కు సంబంధించిన ప్రోమో ప్రస్తుతం వైరల్ గా మారింది. ఈ సందర్భంగా సమంత ‘మీ సూపర్ హిట్ చిత్రాల్లో ఇప్పటి హీరోలు నటించాల్సి వస్తే.. ఏ హీరోకు ఏ చిత్రం సెట్ అవుతుంది’ అని అడిగింది.

ఈ ప్రశ్నకు చిరు పలువురు హీరోల పేర్లు చెప్పాడు. అందులో చరణ్, తారక్, బన్నీ, ప్రభాస్ ఇలా అందరి స్టార్ హీరోల పేర్లూ ఉన్నాయి. అయితే.. ఏ సినిమాకు.. ఏ హీరో అన్నది మాత్రం ప్రోమోలో చూపించలేదు. మరి, చిరు సినిమాల్లో దేనికి ఏ హీరో సెట్టవుతారన్నది తెలియాలి అంటే మాత్రం ఈ డిసెంబర్ 25న ‘ఆహా’లో ఎక్స్ క్లూజివ్ గా స్ట్రీమ్ కానున్న ఈ మెగా ఎపిసోడ్ ను చూడాల్సిందే.