సంక్రాంతి హీరోలకు మాస్ రచ్చ కావాలట

ఈ సారి సంక్రాంతికి చిరంజీవి.. బాలకృష్ణ పోటీ పడుతున్న సంగతి తెలిసిందే. గౌతమిపుత్ర శాతకర్ణికి బాలయ్య ఇప్పటికే షూటింగ్ కంప్లీట్ చేసేసి..పోస్ట్ ప్రొడక్షన్ పనుల్లో ఉండగా.. ఖైదీ నెంబర్ 150 కోసం చిరంజీవి ఫైనల్ షెడ్యూల్ ఫినిష్ చేసేస్తున్నారు. బాలయ్య వందో సినిమా.. చిరంజీవి 150వ సినిమా ఒకే రోజు రిలీజ్ కానుండడంతో.. ఫ్యాన్స్ ఆసక్తిగా ఎదురుచూస్తుంటే.. ఆ తర్వాతి ప్రాజెక్టుపై ఇద్దరు హీరోలు ఇప్పటికే చర్చలు మొదలుపెట్టేశారు.

మెగా ఫ్యామిలీకి ఇప్పటికే ఓ మాస్ హిట్ ఇచ్చిన బోయపాటి శ్రీనుతో.. తన నెక్ట్స్ ప్రాజెక్ట్ చేయాలని అనుకుంటున్నారట చిరు. ఇప్పటికే అల్లు అరవింద్ తో ఓ మాట అనేయడం.. మాటలు మొదలుపెట్టేయడం కూడా జరిగిందని టాక్ వినిపిస్తోంది. మాస్ సినిమాలు మాత్రమే చేయాలనే ఉద్దేశ్యంలో ఉన్న చిరుకు.. సరైనోడు చూసినప్పటి నుంచి బోయపాటితో చేయాలని ఉండగా.. ఆ ప్రాజెక్టునే ఇప్పుడు పట్టాలెక్కించే ప్రయత్నాలు జరుగుతున్నాయి.

మరోవైపు తనకు రెండు బ్లాక్ బస్టర్స్ ఇచ్చిన బోయపాటితో 101వ సినిమా చేయాలని బాలయ్య భావిస్తున్నారట. కృష్ణవంశీతో రైతు చేయాలని భావించినా.. కీలక పాత్రలో నటించేందుకు అమితాబ్ ఒప్పుకోకపోవడంతో.. ఈ ప్రాజెక్టు అర్ధాంతరంగా ఆగిపోయిందని తెలుస్తోంది. సింగీతం కూడా రెడీగానే ఉన్నా.. వరుసగా ప్రయోగాలు చేసేబదులు.. మధ్యలో ఓ మాస్ మూవీ ఉండాలన్నది బాలకృష్ణ ఆలోచన అంటున్నారు. అలా తన నెక్ట్స్ ప్రాజెక్టు పగ్గాలను బోయపాటికి ఇచ్చేయాలని భావిస్తున్నారట. సంక్రాంతికి ఒకేరోజు రిలజ్ లతో పోటీ పడుతున్న చిరు-బాలయ్య.. తర్వాతి సినిమా కోసం డైరెక్టర్ దగ్గర కూడా పోటీ పడుతుండడం ఆశ్చర్యమే.

Like Us on Facebook : https://www.facebook.com/Tupakidotcom/