చిరంజీవి కన్ఫామ్.. మరి కాపాడతారా?

మెగా ఫ్యామిలీ హీరోల్లో అర్జెంట్ గా హిట్ అవసరమైంది సాయి ధరమ్ తేజ్ కే. వి.వి. వినాయక్ డైరెక్షన్ లో తేజు హీరోగా చేసిన రీసెట్ మూవీ ఇంటిలిజెంట్ బాక్సాఫీస్ వద్ద డిజాస్టర్ గా మిగిలింది. ఇంటిలిజెంట్ కు ముందు నాలుగు వరస ఫ్లాపులు తేజు ఖాతాలో ఉన్నాయి. దీంతో ఈ హీరో కెరీర్ గండంలో పడింది. ఇలాంటి టైంలో సాయి ధరమ్ తేజ్ రూటు మార్చి మాస్ యాక్షన్ ఎంటర్ టెయినర్లు పక్కనపెట్టి క్లీన్ లవ్ స్టోరీ చేస్తున్నాడు.

తేజు తాజాగా ప్రేమ కథా చిత్రాల స్పెషలిస్టు కరుణాకరన్ డైరెక్షన్ లో ‘తేజ్.. ఐ లవ్ యూ’ సినిమా చేస్తున్నారు. ఈ సినిమా షూటింగ్ చివరి దశలో ఉంది. సినిమాపై బజ్ పెంచడం కోసం జూన్ 9న హైదరాబాద్ లో ఆడియో రిలీజ్ ఈవెంట్ గ్రాండ్ గా చేస్తున్నారు. ఈ ఈవెంట్ కు చీఫ్ గెస్ట్ గా మెగా స్టార్ చిరంజీవి వస్తున్నారు. చిరు రాకతో మెగా అభిమానుల ఫోకస్ తేజ్.. ఐలవ్ యూపై పడుతుంది. దీంతో సినిమాపై బజ్ పెరుగుతుందని సాయి ధరమ్ తేజ్ ఆశతో ఉన్నాడు.

తేజ్.. ఐలవ్ యూ మళయాళ కుట్టి అనుపమ పరమేశ్వరన్ హీరోయిన్ గా నటిస్తోంది. హీరోయిన్లను అందంగా చూపించడంలో కరుణాకరన్ స్టయిలే వేరు. అనుపమకు కూడా తెలుగులో ఇంతవరకు సరైన హిట్ పడలేదు. ఆమెకు కూడా ఈ సినిమా హిట్ చాలా కీలకం. మేనల్లుడి సినిమాను ప్రమోట్ చేయడానికి చిరంజీవి ముందుకు రావడం తేజ్.. ఐలవ్ యూ కు ఉపయోగపడుతుందని ఫ్యాన్స్ అంటున్నారు. ఇక్కడ కీలకం ఏంటంటే సినిమా బాగుంటేనే చిరు ప్రమోషన్ ప్లస్పవుతుంది. లేకుంటే ఇంతే సంగతులు.