స్టార్ హీరోయిన్ చేత 'లెజెండ్' అనిపించుకున్న మెగాస్టార్..

సౌత్ ఇండస్ట్రీలో తనకంటూ ప్రత్యేక స్థానాన్ని ఏర్పరచుకుంది స్టార్ హీరోయిన్ త్రిష. రెండు దశాబ్దాలకు పైగా ప్రేక్షకులను అలరిస్తూ వస్తున్న త్రిష.. తన అందంతో అభినయంతో ప్రేక్షకుల హృదయాలలో చెరగని ముద్ర వేసింది. ముఖ్యంగా తెలుగు - తమిళంలో స్టార్ హీరోల అందరి సరసన నటించి ఎన్నో అద్భుతమైన విజయాలను అందుకుంది. స్టార్ హీరోలందరితోనూ నటించి స్టార్ హీరోయిన్ గా సినీ ఇండస్ట్రీని ఏలింది. ప్రస్తుతం తెలుగులో సినిమాలు లేకపోయినప్పటికీ తమిళంలో బిజీ ఆర్టిస్ట్. నేడు త్రిష పుట్టినరోజు. త్రిష తన 37వ ఏట అడుగుపెట్టింది. త్రిష పుట్టినరోజు సందర్భంగా పలువురు సినీతారలు ఆమెకు శుభాకాంక్షలు తెలిపారు. వీరిలో మెగాస్టార్ చిరంజీవి కూడా ఉన్నారు.

‘‘హ్యాపీ బర్త్‌ డే త్రిష. నువ్వు ఎల్లకాలం సంతోషంగా ఉండాలని - విజయం నిన్ను వరించాలని కోరుకుంటున్నా. ఈ ఏడాది నీకు అద్భుతంగా ఉండాలి’’ అని చిరంజీవి ట్వీట్ చేశారు. ఈ ట్వీట్‌ కు త్రిష స్పందిస్తూ.. ‘థాంక్యూ టు స్వీటెస్ట్ లెజెండ్’ అని త్రిష రిప్లై ఇచ్చి ఒక లవ్ సింబల్ కూడా పంపింది. మెగాస్టార్ తో 14 ఏళ్ల క్రితం ‘స్టాలిన్’ సినిమాలో నటించింది త్రిష. తాజాగా ‘ఆచార్య’ సినిమాలో రెండోసారి చిరంజీవి సరసన నటించే అవకాశం వచ్చింది. కానీ, అనుకోని కారణాల వల్ల తను ఈ ప్రాజెక్ట్ నుంచి తప్పుకుంది. ‘నీ మనసు నాకు తెలుసు’ సినిమాతో టాలీవుడ్‌ కు పరిచయమైన త్రిష.. ‘వర్షం’ సినిమాతో మంచి క్రేజ్ సంపాదించింది. ‘నువ్వొస్తానంటే నేనొద్దంటానా’ సినిమా త్రిషకు మంచి ఇమేజ్‌ ను తీసుకొచ్చింది. ఇక అక్కడి నుంచి త్రిష వెనుదిరిగి చూసుకోలేదు. ప్రస్తుతం మెగాస్టార్-త్రిష ట్వీట్లు నెట్టింట వైరల్ అవుతున్నాయి.