బాస్ కి స్పెష‌ల్ గిఫ్ట్ ప్లాన్ చేస్తున్న ఆ న‌లుగురు!

ఆగ‌స్టు 22 స్పెష‌ల్ డే .. బాస్ మెగాస్టార్ చిరంజీవి పుట్టిన‌రోజు వేడుక‌ల‌కు ఇప్ప‌టికే అభిమానులు ఏర్పాట్ల‌లో ఉన్న సంగ‌తి తెలిసిందే. త‌దుప‌రి ఆచార్య విడుదలకు సిద్ధ‌మ‌వుతుండ‌గా.. బాస్ బ్యాక్ టు బ్యాక్ సినిమాల‌తో బిజీగా ఉన్నారు. ఇటీవ‌ల న‌లుగురు ద‌ర్శ‌కుల‌కు ఆయ‌న గ్రీన్ సిగ్న‌ల్ ఇచ్చేశారు. వీరంద‌రితో ఒక‌టొక‌టిగా సినిమాలు తెర‌కెక్క‌నున్నాయి.

మోహ‌న్ రాజా ద‌ర్శ‌క‌త్వంలో ప్ర‌స్తుతం లూసీఫ‌ర్ రీమేక్ కోసం ప్రిపేర‌వుతున్న చిరు త‌దుప‌రి బాబీ-మైత్రి మూవీ మేకర్స్ కాంబినేష‌న్ మూవీ #చిరు 154 లో న‌టించ‌నున్నారు. ఆ త‌ర్వాత మెహ‌ర్ ర‌మేష్ తో వేదాళం రీమేక్ లో న‌టించాల్సి ఉంటుంది. ఇక మెగా బ‌ర్త్ డే సంద‌ర్భంగా ద‌ర్శ‌కులంతా స్పెష‌ల్ గిఫ్ట్ ని ప్లాన్ చేస్తున్నార‌ని తెలిసింది.

ఇందులో బాబీ అందించే గిఫ్ట్ ఇంకా స్పెష‌ల్ గా ఉండ‌నుంది. ప్ర‌స్తుతం బాబీ సార‌థ్యంలో చిరు ఫోటోషూట్ చేస్తున్నారు. ఈ ఫస్ట్ లుక్ 22 న విడుదల కానుంది. బాస్ లుక్ ప‌రంగా ద‌ర్శ‌కుడు చాలా జాగ్రత్తలు తీసుకుంటున్నారని ఈ స‌రికొత్త లుక్ తో అభిమానులను ఆశ్చర్యపర్చాలని అనుకుంటున్నార‌ని తెలిసింది. మెగాభిమానుల‌కు ఇది సంథింగ్ స్పెష‌ల్ ట్రీట్ గా నిల‌వ‌నుంది. ఇటీవ‌లే లూసిఫర్ రీమేక్ ప్రారంభ‌మైన సంగ‌తి తెలిసిందే. బాస్ పుట్టినరోజున లూసిఫర్ రీమేక్ కి సంబంధించిన అప్ డేట్ ని రిలీజ్ చేస్తారు. కొర‌టాల‌ ఆచార్య కు సంబంధించిన ప్ర‌చార వీడియో.. వేదాళం రీమేక్ కి సంబంధించిన ప్ర‌క‌ట‌న వెలువ‌డే ఛాన్సుంద‌ని భావిస్తున్నారు. మ‌రోవైపు ప్ర‌పంచ‌వ్యాప్తంగా ఉన్న మెగాభిమానులు చిరు బ‌ర్త్ డేని ప్ర‌త్యేకంగా సామాజిక కార్య‌క్ర‌మాల‌తో జ‌రుపుకోవాల‌ని ప్లాన్ చేస్తున్నారు. ర‌క్త‌దాన కార్య‌క్ర‌మాలు విరివిగా జ‌ర‌గ‌నున్నాయి.