శాతకర్ణి దర్శకుడితో మెగాస్టార్ మంతనాలు

రాబోయే సంక్రాంతి ఎంత రంజుగా సాగుతుందో ఇప్పటికే తెలిసిపోయింది. మెగాస్టార్ చిరంజీవి 150వ సినిమా ఖైదీ నెంబర్ 150.. నందమూరి బాలకృష్ణ సెంచరీ మూవీ గౌతమిపుత్ర శాతకర్ణిలు.. ఒకే రోజున రిలీజ్ అయ్యి సత్తా చాటేందుకు సిద్ధమవుతున్నాయి. సినిమా సక్సెస్ కోసం బాలయ్యతో చిరు పోటీ పడుతున్నారు కానీ.. ఆఫ్ స్క్రీన్ లో అయితే వీరిద్దరూ మంచి స్నేహితులే. అలాగే గౌతమిపుత్ర శాతకర్ణి సక్సెస్ కావాలని కోరుకునేవారిలో మెగాస్టార్ పేరు మొదట్లోనే ఉంటుంది.

ఇందుకు బాలయ్య కంటే.. క్రిష్ డైరెక్షన్ కావడం అసలు కారణం. ఇప్పుడు దర్శుకుడు క్రిష్ ను పిలిపించుకుని చిరంజీవి మాట్లాడడం హాట్ టాపిక్ అయింది. ఇప్పటివరకూ సరైన కమర్షియల్ సక్సెస్ సాధించలేకపోయినా.. దర్శకుడు క్రిష్ సామర్ధ్యంపై చిరుకు అనుమానాలు లేవు. శాతకర్ణితో క్రిష్ ఆ లోటు తీర్చేసుకుంటాడని చిరంజీవి ఆశించడంలో మరో యాంగిల్ కూడా ఉంది. తన 151వ మూవీ గురించి చిరు ఎక్కువగా ఆలోచిస్తున్నారట. ఈ ప్రాజెక్టుకు క్రిష్ కు పగ్గాలు అప్పచెబితే ఎలా ఉంటుందనే ఆలోచన ఉందని తెలుస్తోంది.

అందుకే తనకోసం సబ్జెక్ట్ ప్రిపేర్ చేయమని సూచించారట చిరు. కానీ.. శాతకర్ణిని సక్సెస్ చేయడంపై ఇది ఆధారపడి ఉంటుందని తెలుస్తోంది. బాలయ్య వందో సినిమా గౌతమిపుత్ర శాతకర్ణి విజయం కోసం బాలయ్య-క్రిష్ లతో పాటు మెగాస్టార్ చిరంజీవి కూడా వెయిటింగ్ చేసేస్తున్నారన్న మాట.

Like Us on Facebook : https://www.facebook.com/Tupakidotcom/