'అర్జున్ సుర‌వ‌రం' పై మెగా కాంప్లిమెంట్

ప్ర‌యోగాల‌తో క‌మ‌ర్షియ‌ల్‌ హిట్లు కొట్ట‌డంలో యంగ్ హీరో నిఖిల్ ట్రాక్ రికార్డ్ తెలిసిందే. కార్తికేయ‌ - సూర్య వ‌ర్సెస్ సూర్య‌ - ఎక్క‌డికి పోతావు చిన్న‌వాడా? ఇవ‌న్నీ ఒక‌దానితో ఒక‌టి డిఫ‌రెంట్ క‌థాంశాలు. అత‌డి ఎంపిక‌లే సంథింగ్ స్పెష‌ల్ అని ప్రూవైంది. తిరుగులేని ఎన‌ర్జీ.. ఆలోచ‌న‌లో వేగం .. బ్రెయిన్ విత్ హీరోయిజం నిఖిల్ కి పెద్ద ప్ల‌స్. కొన్ని ఫ్లాపులు ఉన్నా తిరిగి కెరీర్ ప‌రంగా ట్రాక్ లోకి వ‌చ్చే స్పార్క్ ఈ యంగ్ హీరోలో ఉంది అన‌డంలో ఎలాంటి సందేహం లేదు. అందుకే నిఖిల్ ఓ సినిమా చేస్తున్నాడు అంటే మార్కెట్ వ‌ర్గాల‌తో పాటు - అభిమానుల్లో అంచ‌నాలు నెల‌కొంటాయి. కొంత గ్యాప్ త‌ర్వాత వ‌స్తున్న `అర్జున్ సుర‌వ‌రం` పైనా అదే స్థాయిలో అంచ‌నాలు ఏర్ప‌డ్డాయి.

నిఖిల్ ఈసారి జ‌ర్న‌లిస్టుగా ప్రేక్ష‌కుల ముందుకు వ‌స్తున్నాడు. అర్జున్ సుర‌వరం అనే జ‌ర్న‌లిస్ట్ ఇన్వెస్టిగేష‌న్ ఏంటో తెర‌పై చూపించ‌బోతున్నాడు. ఇటీవ‌లే రిలీజైన టీజ‌ర్ ఆద్యంతం ఉత్కంఠ పెంచింది.  టీజ‌ర్ రిలీజైన కొన్ని గంట‌ల్లోనే యూట్యూబ్ - సామాజిక మాధ్య‌మాల్లో జోరుగా వైర‌ల్ అయ్యింది. ఇది రెగ్యుల‌ర్ సినిమా కాదు.. ఇందులో ఏదో కొత్త‌గా ఎటెంప్ట్ చేస్తున్నారు అన్న పాయింట్ అంద‌రికీ క‌నెక్ట‌య్యింది. జ‌ర్న‌లిస్ట్ గా నిఖిల్ లోని గ్రేసు బాస్ మెగాస్టార్ చిరంజీవికి అంతే ఇదిగా న‌చ్చేసింద‌ట‌.

చిరు అర్జున్ సుర‌వ‌రం టీజ‌ర్ చూసి నిఖిల్ కి అద్భుత‌మైన కాంప్లిమెంట్ ఇచ్చేశారు. ఆ విష‌యాన్ని నిర్మాత ద్వారా తెలుసుకున్న యంగ్‌హీరో ఆనందానికి అవ‌ధులే లేవ‌ని తెలుస్తోంది. ఇది నా కెరీర్ లో అత్యుత్త‌మ ప్ర‌శంస‌! అంటూ ట్విట్ట‌ర్ వేదిక‌గా నిఖిల్ ఆనందం వ్య‌క్తం చేశారు. చిరు కాంప్లిమెంట్ కి సంబంధించిన  స్క్రీన్ షాట్ ని  ఈ సంద‌ర్భంగా సామాజిక మాధ్య‌మాల ద్వారా అభిమానుల కోసం షేర్ చేశారు. టి.ఎన్.సంతోష్ ద‌ర్శ‌క‌త్వం వ‌హించిన ఈ చిత్రం మార్చి 29న రిలీజ‌వుతోంది. ఈ ఆనందోత్సాహంలో నిఖిల్ హిట్టు కొట్ట‌డం ఖాయం అన్న చ‌ర్చా సాగుతోంది. విజ‌య్ దేవ‌ర‌కొండ త‌ర్వాత నిఖిల్ కి మెగాస్టార్ బూస్ట్ ఇస్తుండ‌డం ఇక్క‌డ గ‌మ‌నార్హం.