చిరంజీవితో మళ్లీ వీణ స్టెప్‌ వేయిస్తాడేమో?

దాయె దాయె భామ .. పలికే కుందనాల బొమ్మ .. ఇంద్ర సినిమాలో మెగా హిట్‌ సాంగ్‌ ఇది. ఈ పాటను మెగాభిమానులు ఎప్పటికీ మర్చిపోలేరు. ఇందులో మెగాస్టార్‌ వీణ స్టెప్పు ఎంతో పాపులర్‌ అయ్యింది. చిరు కనిపించిన ప్రతి వేదికపైనా మెగాభిమానులంతా ఆ స్టెప్‌ని వేయాల్సిందే అంటూ డిమాండ్స్‌ చేసేవారు. అంతగా ఆకట్టుకున్న ఆ స్టెప్‌ ని మరోసారి రిపీట్‌ చేయనున్నారా? అంటే అవుననే అనిపిస్తోంది.

మెగా పవర్‌ స్టార్‌ రామ్‌ చరణ్‌ నటిస్తున్న బ్రూస్ లీ చిత్రంలో ఓ రీమిక్స్‌ సాంగ్‌ ఉన్న సంగతి తెలిసిందే. మెగాస్టార్‌ చిరంజీవి చరణ్‌-ఇలియానాతో కలిసి స్టెప్పు కలపబోతున్నారు. ఈ పాటలో చిరు వీణ స్టెప్పుని రిపీట్‌ చేసే ఛాన్సుందనే అభిమానులు అనుకుంటున్నారు. లేటెస్ట్‌ అప్‌ డేట్‌ ప్రకారం బాలీవుడ్‌ హిట్‌ సాంగ్‌ కజరారే కజరారే తరహాలో ఈ పాట సాగుతుందని ఇందులో మెగా హీరోలు స్టెప్పులేస్తారని చెబుతున్నారు.

ఎస్‌.ఎస్‌.తమన్‌ సంగీతం అందిస్తుంటే, రాఘవ లారెన్స్‌ ఈ పాటకు స్టెప్పులు కంపోజ్‌ చేస్తున్నారు. అప్పట్లో దాయె దాయె .. సాంగ్‌ కంపోజ్‌ చేసింది రాఘవ లారెన్స్‌ కాబట్టి ఇప్పుడు ఆ బిట్‌ ని గుర్తు చేస్తారనే అనుకుంటున్నారు. ఒకవేళ ఈ లీక్‌ న్యూస్‌ నిజమే అయితే మెగాభిమానులకు మరోసారి అదిరిపోయే ట్రీట్‌ దక్కినట్టే.